100 eldri borgarar mættu í sjávarfangsveislu hjá Stakkavík
Annað árið í röð bauð útgerðar- og fiskvinnslufyrirtækið Stakkavík eldri borgurum í Grindavík, í samvinnu við Félag eldri borgara, í sannkallaða sjávarfangsveislu í húsnæði fyrirtækisins. Yfir 100 eldri borgarar mættu í veisluna og var glatt á hjalla. Greint er frá þessu á heimasíðu Grindavíkurbæjar.
Er þetta gott dæmi um samfélagslega ábyrgð fyrirtækja og hvað þau geta haft jákvæð áhrif á nærumhverfi sitt eins og Stakkavík og fleiri fyrirtæki í Grindavík hafa gert með öflugum stuðningi við félagasamtök og íþróttir í bænum.
Óhætt er að segja að boðið hafi verið upp á dýrindis veisluborð með úrvals fiskmeti sem eldri borgararnir kunnu svo sannarlega vel að meta. Þá var boðið upp á skemmtiatriði. Voru eldri borgararnir afar þakklátir eigendum Stakkavíkur fyrir frábært boð.
