Rúmlega betri

Að jafnaði eyðum við þriðjungi ævinnar í rúminu. Með hugarórum má bæta einhverju við þennan tíma. Hjónaherbergið er heilagasti staður heimilisins og þar gilda önnur lögmál en annars staðar. Við eigum allavega að haga því þannig. Þarna upplifum við bestu stundir lífsins og svo eru einnig dæmi um þær slæmu. Það er náttúrlega alveg bannað. Ætti að skylda alla til þess að hafa ánægjumæli á náttborðinu til að meta ástandið. Enginn má fara óánægður í rúmið, ekki undir neinum kringumstæðum. Hvað þá úr því. Jafnvel þegar allt á móti blæs.

Rekkjan verður líka að standa sína plikt ef hún á að skila tilætluðu hlutverki. Rekkjunautar þurfa að vera samstilltir sem ein órofa heild. Ófáa rimlana hefur maður nú keypt í gegnum tíðina, allt frá skrautlegum kastalagrindum til fjögurra fermetra fjölskyldufleka. Þannig gátu allir púkarnir skriðið upp í ef úti fyrir ýlfraði í Kára. Merkilegt hvað svona fleti hefur að geyma margar góðar minningar enda á alúðin og hlýjan að umvefja þig eins og faðmur frelsarans. Já, „..sænginni yfir minni.“

Svefnmýtan er vissulega mismunandi hjá okkur eins og gengur og gerist. Spánverjarnir skipta henni upp í tvö tímabil á sólarhring en það hef ég aldrei getað. Þarf minn átta tíma órofna svefn, helst ekki minna og alls ekki meira. Verð þreyttur ef ég sef of lengi. Það er samt algjört skilyrði að hvílan sé í lagi og hundarnir þægir, ef mýtan á að ganga eftir. Hef barist við þessi öfl að undanförnu og ákvað að takast á við ástandið eins og sannur húsbóndi á mínu heimili. Samdi við hundana og fór með dýnurnar í aðgerð. Ákvað að herða upp á stálinu. Gormunum meinti ég!

Komst að hjá RB rúmum fyrir náð og miskunn. Bar mig illa og konugreyið sá aumur á mér. Fyrirtæki með tæplega 70 ára sögu hlýtur að hafa heyrt nokkrar sögurnar. Mín þótti eflaust ekkert sérstök en ef þú ert kurteis, þá færðu það endurgoldið. „Komdu með þær snemma í fyrramálið og þær verða eins og nýjar í eftirmiðdaginn“ sagði hún hæversk á móti. Og ég sem hélt að ég þyrfti að sýna frúnni minni nýjar lendur það kvöldið að minnsta kosti. Keypti þrýstijöfnunardýnu í ofanálag fyrir velviljann og nú nær svefnheilsan nýjum hæðum. Og frúin svífur um á bleiku skýi.