Módel 63

Við vorum bara unglingar og foreldrarnir, gamla fólkið, var flest allt í kringum fimmtugt. Það var afskaplega erfitt að ímynda sér að verða þetta gamall. Vá maður, það er ekki fyrr en árið 2013. Ártalið virkaði eins og sena úr Stjörnustríði eða álíka framtíðartrylli. Bílarnir örugglega svífandi um „göturnar“ og hægt að skreppa til útlanda með því einu að fara inn í tímavél og „súmma“ sig þangað sem hugurinn girntist. Kannski hægt að ákveða tímabil líka. Alla vega sáum við það í Nýja-bíói. Böllin áhyggjulaus nema þegar kraftakarlarnir þöndu sig að ósekju. Alltaf einhverjir sem vildu gefa öðrum „gudmorgen“ eftir danstaktinn í Bergás eða Stapanum. Slapp blessunarlega við þann skammt, utan eins smávægilegs atviks.

Borgin heillaði í austri. Ljósadýrðin sást vel frá Hafnargötunni og þar beið okkar glaumur og gleði. Hollywood, Broadway, Óðal eða Klúbburinn til skiptis alla fimmtudaga til sunnudags. Sómaborgari í Hafnarfirði á heimleiðinni. Það voru allir stjörnur í Hollý. Mamma bauð mér jafnan upp á það nýjasta í tískunni. Með tískuvöruverslun í handraðanum. Póseidon var með þetta.  Hippar samtímans með axlapúða og sítt að aftan. Ég fór í öllu gulu einn daginn, alrauður þann næsta. Glimmer og svart á þriðja degi. Gladdi bæði píur og peyja. Korter í þrjú fór allt af stað. Klipinn ýmist í kinnar eða rasskinnar. Algerlega óflókið. Samkynhneigðir að hasla sér völl. Draumatími þeirra upprunninn.

Allt gekk þetta yfir og flest pörin gerðu sér hreiður. Hvert í sínu tré. Sum hver afskaplega laufguð en önnur eins og hríslur að vetri. Náðu ekki að festa almennilega rætur. Voru visin. Lífið gekk þó sinn vanagang og öll tókum við þátt í baráttunni. Hvert á sinn hátt. Börnin urðu til og búskapurinn blómstraði. Upplifðum lífeyrissjóðslánin og húsnæðislánasjóðinn. Nokkur verðbólguskot. Vextirnir sex prósent að viðbættri  verðtryggingu. Harkan sex á tímabili. Bleyjur, blóm og barningur. Lifðum góða tíma og stanslaust fjör. Flest okkar.

Lítum yfir farinn veg og yljum okkur við fortíðina. Nútíminn lemur mismikið á okkur. Brosum framan í heiminn og ætlum okkur betri tíma. Fyrir okkur öll. Mig og þig. Og gamla fólkið líka. Svo ekki sé talað um börnin. Guði sé lof fyrir kynslóðina sem tekur við af okkur. Arfleifðin sem ætlar að sjá um okkur í ellinni. Ég veit að módel 63 skilar sínu vel frá sér og verður öðrum leiðarljós á veginum til betra lífs og löngunar. Góða skemmtun um helgina, gamla fólk!