Kærleikur á kyndilmessu

Þriðju jólin í röð veltum við hjónin því fyrir okkur hvað við ætluðum að kaupa sameiginlega í jólagjöf. Þriðju jólin í röð stóð ég mig að því að doka við. Nýtt sjónvarp var ofarlega á listanum. Sjónvarpssófi eða borðstofuborð komu líka sterklega til greina. Jólastressið allsráðandi og einbeitingin fór öll í það að kaupa í matinn og velja í pakkana handa krökkunum. Spenningurinn örlítið meiri en undanfarin ár og ekki úr vegi að lopavettlingaþemað væri gengið yfir. Gamli rembingurinn farinn að láta á sér kræla aftur. Eigum við samt ekki að bíða eftir útsölunum, spurði ég venju samkvæmt. Þetta hrynur allt í verði á nýárinu.

Vöðvabólgan farin að segja verulega til sín í öxlunum. Höfuðið hékk út á hlið til að lina verstu kvalirnar. Strengir og bólguhnúðar niður eftir hryggjarsúlu eiginkonunnar boðuðu ekki gott. Íbúfenkremið brúkað eins og sólarolía á sumardegi. Þetta gengur ekki lengur, sagði hún ábúðarfull á þrettándanum. Eigum við ekki bara að kaupa okkur hjálpartæki? Ég varð hugsi eitt augnablik. Nei, ég sá svo svakalega fínt nuddsæti fyrir bak og herðar í Eirberg, sem gæfi okkur miklu meira heldur en allt hitt. Mér var hugsað til bláu fótanuddtækjanna sem standa ónotuð uppi á háaloftum landsmanna frá áttunda áratug síðustu aldar. Er þetta nokkuð svakalega dýrt, spurði ég áhugasamur um leið og ég bruddi síðasta lyfjaskammtinn.

Frúin hringdi í dauðans ofboði. Fékk tilkynningu frá fésbókinni um að verið væri að bjóða sætið á afskaplega góðum afslætti. Kallinn blessunarlega staddur í höfuðborginni og brunaði beinustu leið upp á Höfða. Góðan daginn, eru þið að bjóða nuddsæti á góðum kjörum? Já, þau eru öll á afslætti nema þetta hérna. Þetta er það allra nýjasta hjá okkur, sagði afgreiðsludaman hnarreist. Axlabólgan tók sig óvænt upp að nýju. Öll á afslætti nema okkar sæti. Ég verð að hringja í frúna og segja henni að sætið verði ekki tekið að sinni. Hún á eftir að kjökra í símann. Hún sá þetta auglýst hjá ykkur á heimasíðunni, sagði ég sannfærandi röddu.

Ég gekk niðurlútur út í bíl og færði henni ótíðindin. Bíllinn kominn í bakkgír þegar sölufólkið kom hlaupandi út að búðarglugganum baðandi út öllum öngum. Bíddu, bíddu, komdu inn, las ég út úr fingramáli og brosmildi starfsmanna hjálpartækjabankans. Þetta var alveg rétt hjá þér, sætið átti reyndar ekki að vera á afslætti en við stöndum við okkar. Við bjóðum þér kærleiksnudd á kyndilmessu.