Gestur í himnaríki

Ég er sannfærður um að leið okkar að loknu þessu jarðríki liggi til himna. Flestar sálir eiga greiðan aðgang ef þeir mæta reglulega til messu. Ekki samt fá í magann ef þú ert á tossalistanum yfir þá sem eru með lélega mætingu. Nægt framboð á næstunni fyrir alla að mæta í messugjörð og iðrast. Það sem manni dettur ekki í hug á leiðinni um úfið hraun og svartan vegkafla! Fyrir þrjátíu árum arkaði ég um nærsvæðið með byssu í hendi og hitti fyrir rjúpuna einu. Á svipuðum tíma datt nafna mínum það snjallræði í hug að baða sig í affalli orkuversins í Svartsengi. Eftirleikinn þarf varla að nefna. Einstakt samspil náttúru, tækni og síðar viðskipta.

Þeir eru samt færri sem hafa notið þeirra lystisemda sem Bláa lónið hefur getið af sér. Lækningalindin rétt austan við aðal baðstaðinn lætur lítið fyrir sér fara. Samstarf þeirra við heilbrigðisyfirvöld hefur opnað nýja veröld fyrir þá sem þurfa að leita sér lækninga við húðsjúkdómnum psoriasis. Og ég sem var að setja út á ríkisstjórnina fyrir stuttu. Heill sé heilbrigðisráðherrum þessa lands að minnsta kosti. Eitthvert fegursta dæmi um jákvæða viðleitni við náttúrulegum lækningaaðferðum. Staðsett á miðri hraunbreiðu á Reykjanesinu þar sem kraftmikið náttúrulegt umhverfi hefur endurnærandi áhrif á líkama og hug. Grindavík er með‘etta.

Ég hef verið svo lánsamur að undanförnu að fá að fylgja sjúklingi í meðferð. Einstök upplifun að koma á staðinn og baða sig meðal fólksins. Yndislegt að láta sig fljóta um í kvöldkyrrðinni, horfa upp í stjörnubjartan himininn og leyfa ímyndunaraflinu að fara á flug. Engu líkara en að hraungrýtið myndi steinaldarskrímsli sem spúa eldi og reyk yfir viðstadda. Gufumekkirnir úr lindinni magna seiðinn og galdrana á meðan á dvölinni stendur. Vellíðanin jafnast eflaust á við að vera fóstur í móðurkviði, umvafinn hlýju og líkamlegri næringu. Fósturfitan borin á líkamann í formi kísils. Andleg næring nær sínum hæstu hæðum með líkamlegri afslöppun. Flýtur um með kút og kork.

Húðin hitnar og blóðstreymið eykst. Gerir hana móttækilegri fyrir virkum efnum jarðsjávarins.  Steinefnin róa húðina og koma á hana jafnvægi, kísillinn hreinsar og þörungarnir næra og mýkja. Náttúruleg þrenna. Ljósaböð í eftirrétt. Dásemdin fullkomnuð með því að setjast í veitingasalinn að lokinni meðferð, slaka á og njóta samverunnar. Kaffisopinn guðdómlegur. Ég er jafn sannfærður um að ef himnaríki er til á jörðu, þá ég er þar reglulegur gestur.