Ég lofa því

Hélt landsfundinn minn um helgina. Laugardagurinn féll einkar vel að uppgjöri síðastliðinna fjögurra ára. Flokkurinn minn er í einmenningskjördæmi og stendur og fellur með loforðum sem skráð eru á tossamiða. Alltaf gaman að strika út það sem búið er að gera. Og lofa. Stefnan var mörkuð í miðju hruni og ráðgert að klára allt á tilsettum tíma, svo lengi sem fjármagnið leyfði eða aurarnir dygðu. Þetta myndi allt blessast að lokum. Hugurinn valdi og taldi verkefnin af kostgæfni. Ég fór vel af stað. Af ástríðu og eldmóði. Allt lék í höndunum á mér.

Verkefnin voru misstór og tímafrek. Sum framkvæmd oftar en einu sinni. Eitt og annað var afgreitt á einum degi. Annað tók vikur eða mánuði. Það þurfti að skipta um blöndunartæki, sturtuhaus, vatnslás, sturta-niður græjur í salerniskassanum, viftu á baðinu, hitaelement í lokuðu lagnakerfi, krækjur á svalahurð, klæða bílskúrinn, mála glugga og veggi inni, mála glugga, hurðar og húsið að utan, loka gemsa, slípa og bera á sólpallinn, laga ljós í eldhúsi, bæta við reykskynjurum, láta gera við þurrkarann, þvottavélina, sjónvarpið og örbylgjuofninn.   

Svo er alltaf eitthvað sem mögulega dregst fram á næsta kjörtímabil. Það á eftir að klára rafmagnið og ljósin í bílskúrnum, lakka gólfið og setja upp hillur á sama stað að ógleymdum bílskúrshurðaopnaranum, setja lofttúðu á þakið, viftu í þvottahúsið, laga húninn á sólpallshurðinni, tengja ljósin í gemsanum, setja flasningar yfir rennur, tengja dyrabjölluna og setja húsnúmer á framhliðina. Svo langar mig ofsalega til þess að slípa parketið og lakka. Ég treysti því að vinir mínir lesi valsinn og fari að mæta í kaffi og með því. Sumir hlutir gerast hægt en með góðri samvinnu og samheldni ávinnur flokkurinn sér traust sem tryggir honum áframhaldandi búsetu eftir kjördag. Þolinmæði þrautir vinnur allar.

Þá er að smala atkvæðum. Ég stend frammi fyrir því, að þurfa að svara fyrir gjörðir mínar. Eflaust einhverjir sem hefðu geta gert þetta betur. Eða verið fljótari að afgreiða verkefnin. Ég vísa óunnum málum til föðurhúsanna og kenni öðrum alfarið um það sem aflaga fór. Fjármunum var einnig ráðstafað á allt annan veg en til stóð samkvæmt tossamiða. Fullyrði þó að þeir voru nýttir í þágu góðra málefna. Það býr heill hellingur í mér ennþá og ég mun stoltur ljúka öllu því sem útaf stendur sem og að takast á við ný verkefni. Algerlega í lófa lagið. Ég lofa því.