Austur á Klaustur

Ein ferð á ári. Tilhlökkun allan ársins hring. Undirbúningur og eftirvænting. Jarðhræringarnar trufluðu okkur og aðra veiðimenn á síðasta ári. Varla vært fyrir ösku og djöfulgangi. Búalið á Seglbúðum bauð ekki upp á neina útiveru né viðveru í öskurótinu. Söknuður af útiverunni og náttúrunándinni var farin að segja til sín. Frúin lifir ekki af árið án þess að komast austur á Klaustur. Þetta er hennar tími og ekkert kemur í veg fyrir nautnina nema náttúruöflin láti á sér kræla. Samveran og sameiningin tengir hópinn órjúfanlegum böndum. Allt fær að flakka og það sem sagt er, satt eða logið, er skilið eftir í hraunpollum Grenlækjar. Ægifegurð árinnar og náttúrulistaverkin í landslaginu draga fram dásemdir sálarlífsins.

Dró með mér Bændablaðið í sjoppunni á Hvolsvelli. Eins og gullmoli í höndum sunnlenskra sveitamanna. Sneisafullt af fróðleik og visku. Á forsíðu mátti lesa um góðar uppskeruhorfur þrátt fyrir þurrkatíð. Í miðopnu mátti lesa fróðleik um viðmiðunarverð stjórnar Landssamtaka sauðfjárbænda á lambakjöti fyrir komandi sláturtíð. Birt á heimasíðu þeirra. Haustið 2011 var meðalverð á lambakjöti til bænda 502 krónur á kíló. Þetta er verð að meðtöldum uppbótargreiðslum sem afurðarstöðvar greiddu. Stjórnin telur að verðið til bænda þurfi að hækka um heilar 48 krónur sem þýði um 9% hækkun. Mig sundlaði við þessar upplýsingar og sá fyrir mér að milliliðir og verslanir kríuðu heldur betur til sín þegar skrokkurinn í heild sinni til bænda leggst á tæpar níu þúsund krónur. Hryggurinn kostar mig helminginn af því verði út úr búð. Þá er allt annað eftir af dýrinu.

Við vöknuðum í golu og sudda klukkuna langt gengna í tíu. Erlendur bóndi leit við í gættina og sá að mannskapurinn var hingað kominn til þess að njóta lífsins. Með árunum leggjum við minna upp úr veiði og meira upp úr værð. Fiskarnir hans koma aftur ár eftir ár og svei mér þá ef hann þekkir þá ekki með nafni. Silfurslegnir og doppóttir. Eins og fingraför sjávarguðsins. Hvísla til þín á bakkanum og heilsa með vænu narti.

Kvöldvökurnar gerast ekki betri. Farið yfir helstu viðburði dagsins á meðan lambakjötið mallar á sjóðheitu grillinu. Hitaskipti, fataskipti, tímaskipti og pilluskipti eiga öll sínar merkingar. Eitthvað sem enginn skilur nema vera meðlimur. Hlátrasköll og gáski ríða ekki einteyming. Potturinn yljar kroppinn og kertaljósin loga eins og klæðin rauð. Í stjörnubjörtu himinhvolfinu.