Allt í plati

Vinnuvélarnar frá Aðalverktökum hörfuðu undan harðvítugum Hraunavinum Álftnesinga. Bæjarstjórinn á Tjarnargötunni, sem hafði teflt hraðskák í kaffitímanum við forseta bæjarstjórnar, sá sér leik á borði. Ákvað að nýta pattstöðuna á meðan málshöfðunin fengi sinn meðgöngutíma í kerfinu. Brunaði út á nes og tilkynnti mótmælendum að nú yrði önnur grafan færð, þar sem hún myndi sinna verkefnum annars staðar um stund. Fagnaðarlátunum ætlaði aldrei að linna. Vinnumennirnir fengu fyrirmæli um að færa gröfuna hið snarasta til Keflavíkur. Það er löngu tímabært að byggja mosku í skrúðgarðinum, var haft eftir honum. Vildi ólmur byggja bænahús beint fyrir utan bæjarskrifstofurnar enda kominn í þrot með loforðalistann. Nú skyldu heimamenn fá að biðja til ráðamanna um bættan hag og betri skilyrði.

Mótmæli við byggingu álvers í Helguvík voru í hámælum. Almenningur var ekki reiðubúinn til þess að menga norðangarrann öllu frekar. Alveg nóg að hafa gúanóbræluna endrum og eins frá íhaldinu, hrópuðu umhverfissinnarnir. Fjölyrtu einnig að búast mætti við því að Kalka færi að spúa miklu meira sóti þegar Norðfjörðinn færi að bjóða öllum frítt í ruslagámana eftir áramótin. Krataforinginn ruglaði þá algerlega í ríminu þegar hann spurði þá hvort þeir vildu frekar hafa draslið á víðavangi. Fylgi Sjálfstæðisflokksins hrynur í skoðanakönnun bæjarblaðsins, sem hefur ekki tekið púlsinn frá síðustu bæjarstjórnarkosningum. Besti-flokkurinn fær mikið fylgi eftir að Vésteinn Veskú, danskættaður Innri-Njarðvíkingur, stígur fram og kynnir nýjar áherslur í bæjarbragnum.

Áskoranir og undirskriftir hefjast um sama leyti á Sending.is. Aðgerðarsinnar vilja flytja innanlandsflugið til Keflavíkur. Njarðvíkingar andmæla kröftuglega enda löngu leiðir á flugvélahvin allan sólarhringinn. Vilja ekki sjá bannsettar smárellurnar sveimandi yfir húsþökunum, loksins þegar herbröltið er að mestu yfirstaðið. Heimasíðan liggur niðri sökum álags. Einhverjir halda því fram að vírusinn sé af grænum toga. Fyrstu tölur benda þó til þess að áhuginn fyrir herferðinni sé lítill. Alveg nóg að hafa millilandaflugvöll, heyrist á kaffistofum. En við höfum allt sem þarf til að sinna innanlandsfluginu, heyrist á öðrum. Meira að segja skurðstofustálið liggur vannýtt í bæjarfélaginu.

Bæjarsjóðurinn er samt allur að braggast. Óinnleysta skuldabréfið vex í takt við hlutabréfavísitöluna og nú er svo komið, að hægt er að kaupa aftur gæsina sem verpir gulleggjunum. Fyrir afganginn má innleysa Reykjaneshöllina og skólabyggingarnar. Langvarandi skuldabaggi hafnarinnar skolast út á kútmagakvöldi með þingmönnum svæðisins. Það er ljós við enda ganganna, segja öldungarnir á nýja hjúkrunarheimilinu á Nesvöllum. Lífið gengur sinn vanagang, jafnvel þó allt sé í plati. Það er nefnilega gott að búa í Reykjanesbæ.