Yfirburðastaða Sjálfstæðisflokks

Sjálfstæðisflokkurinn í Reykjanesbæ er með yfirburðastöðu fyrir komandi sveitarstjórnarkosningar samkvæmt nýrri skoðanakönnun Fréttablaðsins sem birt er í dag. 71,2 prósent þeirra sem tóku afstöðu sögðust myndu kjósa Sjálfstæðisflokkinn, væri boðað til kosninga nú. Samkvæmt því fengi Sjálfstæðisflokkurinn góðan meirihluta í bæjarstjórn með átta til níu bæjarfulltrúa kjörna af ellefu. Jafnt er milli níunda manns Sjálfstæðisflokksins og þriðja manns A-listans.

Yfirleitt hefur Sjálfstæðisflokkurinn meira fylgi meðal karla en kvenna, en í Reykjanesbæ ber annað við, þar sem 67,0 prósent karla sögðust myndu kjósa flokkinn, en 76,8 prósent kvenna. Flokkurinn bætir mikið við sig frá síðustu sveitarstjórnarkosningum, þegar hann hlaut 52,8 prósent atkvæða. Þá er þetta einnig meira fylgi við Sjálfstæðisflokkinn en mældist í skoðanakönnun Félagsvísindastofnunar sem birtist 9. maí, þegar 67,5 prósent sögðust myndu kjósa hann.

A-listi Framsóknarflokks, Samfylkingar og óháðra hefur, samkvæmt könnuninni 23,7 prósent fylgi og fengi samkvæmt því tvo til þrjá bæjarfulltrúa kjörna. Í síðustu kosningum fengu Framsóknarflokkur og Samfylking samtals 47,2 prósent atkvæða og því lítur út fyrir að fylgi beggja þessara flokka dali verulega í sveitarfélaginu. Fylgi A-listans mælist nú einnig minna en í könnun Félagsvísindastofnunar, þar sem flokkurinn mældist með 32,0 prósent fylgi. 0,6 prósent þeirra sem tóku afstöðu sögðust myndu kjósa annað hvort Samfylkingu eða Framsóknarflokk, frekar en að merkja við A-listann. Þetta tæpa prósent er ekki talið með, en ef svo væri gert myndi það duga til að A-listinn teldist fá þrjá bæjarfulltrúa en Sjálfstæðisflokkur átta. Karlar styðja frekar A-listann en konur, 25,6 prósent karla myndu kjósa listann væri boðað til kosninga nú, en 21,3 prósent kvenna.

Frjálslyndir og óháðir hafa nú stuðning 2,0 prósenta þeirra sem tóku afstöðu. Flokkurinn bauð ekki fram í síðustu kosningum og hafði ekki tilkynnt framboð þegar Félagsvísindastofnun mældi fylgi í Reykjanesbæ og mældist þar því ekki. 2,5 prósent karla segjast myndu kjósa flokkinn, en 1,3 prósent kvenna.

Reykjanesbæjarlistinn hefur stuðning 1,7 prósenta þeirra sem tóku afstöðu í könnuninni. Listinn hefur ekki áður boðið fram í sveitarstjórnarkosningum. Í könnun Félagsvísindastofnunar mældist R-listinn með 0,2 prósent fylgi og hefur því aukist nokkuð síðan þá. Nánast einungis karlar sögðust myndu kjósa Reykjanesbæjarlistann í skoðanakönnun Fréttablaðsins. Baldvin Nielsen, sem leiðir Reykjanesbæjarlistann er tengdur Frjálslynda flokknum, en þó svo þessi tvö framboð myndu sameinast fengi slíkt sameiginlegt framboð ekki mann kjörinn í bæjarstjórn.

Vinstri hreyfingin-grænt framboð bauð ekki fram lista í síðustu sveitarstjórnarkosningum, en mælist nú með 0,8 prósenta fylgi. Þetta er aðeins meira fylgi en flokkurinn mældist með í könnun Félagsvísindastofnunnar þegar hann, líkt og Reykjanesbæjarlistinn mældist með 0,2 prósent. Líkt og hjá Reykjanesbæjarlistanum eru það nánast einungis karlar sem segjast myndu kjósa vinstri græna í könnun Fréttablaðsins.

Hringt var í 600 íbúa Reykjanesbæjar laugardaginn 13. maí og spurt var: Hvaða lista myndir þú kjósa ef boðað yrði til sveitarstjórnarkosninga nú? 59,7 prósent tóku afstöðu til spurningarinnar.

Einnig var spurt hvort fólk væri fylgjandi því að álver yrði reist í Helguvík. 82,3 prósent tóku afstöðu til spurningarinnar. Af þeim sem tóku afstöðu sögðust 77,1 prósent vera því fylgjandi, en 22,9 prósent vilja ekki álver í Helguvík.

Vísir.is greinir frá í dag.