Yfir 200 manns á sameiginlegum framboðsfundi í Reykjanesbæ

Í tilefni að prófkjöri sjálfstæðismanna í Reykjanesbæ á laugardaginn var haldinn sameiginlegur fundur frambjóðenda á veitingastaðnum Ránni í gærkvöldi. Augljóst var á fjölda fundagesta að mikil stemmning hefur myndast fyrir prófkjörinu en fullt var út úr dyrum, þó allir hafi komist að sem vildu.

Ragnheiður Elín Árnadóttir, oddviti Sjálfstæðisflokksins í Suðurkjördæmi, setti fundinn og fór yfir hversu glæsilegir frambjóðendur gæfu kost að sér í prófkjörinu og hversu samheldni hópsins væri góð. Hvatti hún sjálfstæðismenn til að taka þátt í prófkjörinu á laugardaginn og mynda öflugan lista, bæjarbúum til heilla.

Að setningu lokinni hófst svokallað „hrað-stefnumót“ með frambjóðendum, þar sem hver og einn frambjóðandi sast á sitthvort borðið, kynnti sig fyrir gestum borðsins og fékk að kynnast þeim. Þannig gekk fundurinn þar til frambjóðendur höfðu farið á hvert borð.

Mikil ánægja var meðal yfir 200 fundargesta að fundi loknum og var það mál manna að erfitt yrði að velja úr svo glæsilegum frambjóðendahópi á laugardaginn.