Vogar: Hart deilt í bæjarstjórn

Föst skot hafa gengið á milli meirihluta og minnihluta í bæjarstjórn Voga að undanförnu.

Í fræslunefnd fyrir skömmu var rætt um að ekki hafi enn verið fullmannað við Stóru-Vogaskóla og þar að auki voru samþykktar tvær umsóknir um launalaus leyfi.

H-listi, sem er í minnihluta, lagði því fram eftirfarandi bókun: Nú er komin upp sú alvarlega staða að 1/3 hluti kennara við Stóru-Vogaskóla  mun hætta störfum við skólann í haust og/eða fara í leyfi.
Erfiðlega gengur að manna þessar stöður og auglýsingar hafa ekki skilað miklum árangri.

Við óttumst  því miður að þetta séu afleiðingar árása meirihl. fræðslunefndar á skólastjórnendur, og starf skólans s.l. ár.
Þykir okkur því full ástæða til að minna enn og aftur á niðurstöðu könnunar sem gerð var hjá foreldrum s.l. haust, en þar kom fram að 98% þeirra var ánægður með  aðbúnað skólans og 96% með kennslu í skólanum.
Erfitt er að túlka þessa niðurstöðu á annan hátt en að almennt séu foreldrar mjög jákvæðir í garð skólans.

Von okkar er sú að vel takist til að ráða í þessar stöður fyrir komandi skólaár svo áfram verði hægt að halda uppi farsælu starfi innan skólans.

Meirihlutinn áskildi sér rétt til að svara þessari bókun síðar og stóð við það á síðasta bæjarstjórnarfundi. Þar hörmuðu þau „tilhæfulausar ásakanir“ minnihlutans og bættu við:

Meirihluti bæjarstjórnar lýsir yfir fullu trausti á störfum meirihlutans í fræðslunefnd og þeim faglegu vinnubrögðum sem viðhöfð hafa verið frá upphafi kjörtímabils. Fræðslunefnd hefur ákveðnum skyldum að gegna við að framfylgja stefnu bæjarstjórnar og þeim lögum og reglum sem gilda í fræðslumálum.
Fulltrúum í fræðslunefnd stóð til boða að sækja námskeið um hlutverk fræðslunefnda í vetur og sóttu allir fulltrúar meirihlutans það námskeið, ásamt einum fulltrúa minnihluta. Að mati meirihluta bæjarstjórnar hefur fræðslunefnd verið að sinna hlutverki sínu vel síðastliðinn vetur.

Inga Sigrún Atladóttir ítrekaði eftir það bókun minnihluta fræðslunefndar á fundi nefndarinnar þann 18. júní og hafnaði því að gagnrýnin sé tilhæfulaus. Ennfremur hvatti hún til þess að í framtíðinni yrði unnið sameiginlega að hagsmunum skólans.

Anný Helena Bjarnadóttir frá meirihlutanum steig þá í pontu og tók fram að í fundargerðum fræðslunefndar sé ekkert að finna sem styður ásakanir minnihlutans.

Lauk þar umræðu um fræðslumál á fundinum en sennilega mun þetta mál koma til tals á næstunni.