Vinnum saman - þá vinnum við

Kosningabaráttan í Reykjanesbæ hefur verið sérstök að mörgu leyti. Fyrir það fyrsta eru miðjuöflin, jafnaðar- og félagshyggjuöflin í íslenskum stjórnmálum, að bjóða fram sameiginlegan lista ásamt óflokksbundnum einstaklingum undir merkjum A-listans.
Það er einnig merkilegt að í framboði eru fleiri listar en reiknað hafði verið með. Það getur skipt máli þegar upp verður staðið því aukin hætta er á að atkvæði detti dauð niður en á því hagnast helst Sjálfstæðisflokkurinn. Þá er einnig merkilegt að skoða hvernig sjálfstæðismenn í Reykjanesbæ hafa þreytt þessa kosningabaráttu.

Kosningabarátta D-listans kostuð af öðrum
Sjálfstæðisflokkurinn, sem setið hefur í meirihlutastjórn þetta kjörtímabil hefur nýtt sér stöðu sína sem sitjandi valdhafar út í ystu æsar. Bæjarstjóranum hefur verið teflt fram sem embættismanni og meðframbjóðendur hafa ekki sést alla kosningabaráttuna. Meðal verkefna bæjarstjórans að undanförnu hafa verið skóflustungur af ýmsu tilefni, vígsluathafnir, kaffiboð og hverfafundir þar sem bæjarstjórinn hefur ekki komið fram sem frambjóðandi heldur sem embættismaður. Ekkert hefur skort á gjafmildi hans og hafa börnin okkar notið hennar m.a með gjöfum sem kostaðar hafa verið af verktakafyrirtækjum.

Verðskuldar Sjálfstæðisflokkurinn fylgisaukningu?
Sú fylgisaukning sem Sjálfstæðisflokkurinn hefur verið að mælast með í skoðanakönnunum að undanförnu er algjörlega óverðskulduð. Afrek sjálfstæðismanna á þessu kjörtímabili felast í því að selja fasteignir okkar og nýta helminginn af þeim fjármunum í rekstur, í stað þess að greiða upp skuldir en hagræðið með fasteignafélaginu átti að felast í að greiða upp skuldir sveitarfélagsins. Þannig hafa sjálfstæðismenn eytt 1,5 milljarði umfram eiginlegar rekstrartekjur á þessu kjörtímabili. Það er ekkert að mál að eyða peningum, en það er erfiðara að afla þeirra. Árangur sjálfstæðismanna í þeim efnum er enginn.

A-listinn fyrir fólkið í bænum
Málefnaundirbúningur A-listans fyrir þessa kosningabaráttu var með samráði við íbúa á fjölda opinna funda. Til varð stefnuskrá sem einkennist af aukinni þjónustu við íbúa þar sem sérstök áhersla er lögð á börnin okkar. A-listinn mun  koma á þátttökukortum að upphæð 25.000 kr fyrir börn 6-16 ára sem nýta má í íþrótta- ,tómstunda- og menningarstarfi.. Það er í samræmi við áherslur ÍSÍ sem hvetur sveitarfélög til að auka niðurgreiðslur vegna félagsþátttöku barna. Við ætlum að lækka leikskólagjöld um helming en sjálfstæðisflokkurinn hefur hækkað þau umtalsvert á kjörtímabilinu og eru leikskólagjöld nú langhæst í Reykjanesbæ þegar borin eru saman stærstu sveitarfélögin. Munar þar allt að 128%. Þetta eru dæmi um áherslur A-listans sem skilja hann frá Sjálfstæðisflokknum.

A-listinn til jöfnuðar
Því er stöðugt haldið fram að sveitarstjórnarkosningar séu ekki pólitískar og því skipti ekki máli hverja þú kjósir. Slíkar fullyrðingar eru fjarri öllum raunveruleika. Verkefnin, hvort þau eru unnin af ríki eða sveitarfélögum byggjast á þjónustu við fólkið. Þegar kemur að því að forgangsraða ræður hugmyndafræði stjórnmálamanna því hver forgangsröðunin verður. A-listinn byggir á hugsjónum jöfnuðar og aukinnar samfélagslegrar ábyrgðar. Við leggjum áherslu á þjónustu við íbúa alla ævi. Þar má enginn verða útundan.
Sért þú sömu skoðunar, þá áttu samleið með okkur í A-listanum.

Guðbrandur Einarsson
oddviti A-listans í Reykjanesbæ