Vilt þú starfa á miðjunni?
Framsóknarmenn líta framtíðina björtum augum og ganga hnarreistir inn í komandi kosningabaráttu. Flokkurinn er óhræddur við að leggja störf sín fyrir dóm kjósenda enda hefur flokkurinn unnið vel og af einhug að stefnumálum sínum með manngildissjónarmiðin að leiðarljósi. Enn er ekki ljóst hvort stillt verði upp lista flokksins í suðurkjördæmi eða prófkjörsleiðin valin en ákvörðun um það verður væntanlega tekin fljótlega. Brýnt er í aðdraganda kosninga að fá öfluga liðsmenn til starfa sem eru reiðubúnir að berjast fyrir málefnum Framsóknarflokksins í þágu kjósenda enda mikið og skemmtilegt starf við málefnavinnu framundan.
Ljóst er að Framsóknarflokkurinn hefur mátt þola á stundum, óverðskuldaða gagnrýni á landsvísu frá pólitískum mótherjum. Mikið verk er fyrir höndum hjá flokknum við að kynna stefnumál sín og þurfum við góða liðsheild og brýnt er að eindrægni og góður andi ríki í starfinu sem framundan er. Það er öllum ljóst að ný forysta flokksins á eftir að kynna sig betur fyrir landsmönnum og þurfa framsóknarmenn að koma fram sem ein heild í komandi baráttu, slíkt mun gagnast flokknum best.
Aðalfundur fulltrúaráðs framsóknarfélaganna í Reykjanesbæ er nýlokið og var Arngrímur Guðmundsson kjörinn nýr formaður fulltrúaráðsins. Framsóknarmenn í Reykjanesbæ hittast á vikulegum fundum í Framsóknarhúsinu, Hafnargötu 62 á laugardagsmorgnum þar sem málin eru rædd og skipst er á skoðunum um flokksstarfið.
Starf Framsóknarflokksins í Reykjanesbæ er með ágætum en betur má ef duga skal. Við þurfum öll að leggjast á eitt til að ná settu marki og stuðla að góðum sigri flokksins í kjördæminu sem og landinu öllu næsta vor.
Því er brýnt að hvetja alla sem áhuga hafa á að starfa í lýðræðislegum miðjuflokki að ganga til liðs við Framsóknarflokkinn.
Hægt er að nálgast frekari upplýsingar um starfið á heimasíðu flokksins í Reykjanesbæ á www.xbreykjanesbaer.is. þar er einnig hægt að panta viðtalstíma við bæjarfulltrúa okkar Eystein Jónsson.
Brynja Lind Sævarsdóttir
Formaður FUF í Reykjanesbæ.
