Vika símenntunar haldin í þriðja sinn 8. -14. september 2002

Vika símenntunar verður haldin dagana 8.-14. september nk. Vikan sem er á vegum Menntamálaráðuneytisins, er nú haldin í þriðja sinn hér á landi og sér Mennt -samstarfsvettvangur atvinnulífs og skóla um skipulagningu og framkvæmd hennar í samvinnu við símenntunarmiðstöðvar um land allt. Þema Viku símenntunar að þessu sinni er símenntun í atvinnulífinu og er því beint til allra þeirra sem taka þátt í atvinnulífinu hvort sem um er að ræða stjórnendur eða almenna starfsmenn; alla þá sem vilja bæta við þekkingu sína og verða þannig hæfari starfskraftar sér og öðrum til framdráttar. Áhersla verður einnig á almenna hvatningu og kynningu á mikilvægi símenntunar fyrir almenning.Vika símenntunar er viðamikið verkefni þar sem fjölmargir eru kallaðir til samstarfs s.s. ráðuneyti, aðilar vinnumarkaðarins, fyrirtæki og menntastofnanir. Verkefninu til stuðnings er efnt til kynningarherferðar til að auka slagkraft þess.

Við ósksum þess að fyrirtæki á Suðurnesjum nýti sér verkefnið til hvatningar og kynningar á því símenntunarstarfi og starfsþjálfun sem fram fer innan fyrirtækja.

Skúli Thoroddsen , forstöðumaður MSS


D A G S K R Á

"Símenntun í atvinnulífinu" og "Menntun er skemmtun" eru slagorð viku símenntunar 8. - 14. september 2002 sem Menntamálaráðuneytið stendur fyrir um allt land. Markmið vikunnar, sem er haldin á Suðurnesjum, í samstarfi við MSS, er að hvetja fólk og fyrirtæki til að auka við þekkingu sína og færni þar sem "Menntun er skemmtun" vísar til ánægjunnar við að læra og ná tökum á nýjum viðfangsefnum.

Dagskrá viku símenntunar á Suðurnesjum 8. -14. september 2002


• 8. september
Námskrá MSS- Miðstöðvar símenntunar á Suðurnesjum, dreift í hús á Suðurnesjum

• 9. september
Símenntun í atvinnulífinu, markviss uppbygging starfsmanna

Markviss-dagurinn, ráðstefna í Eldborgv/Svartsengi kl. 13:30-15:30 öllum opin.
Tómas Ingi Olrich, menntamálaráðherra flytur ávarp.
Árni Sigfússon, bæjarstjóri í Reykjanesbæ ræðir símenntun fyrir atvinnulífið.
Grétar Þorsteinsson forseti ASI ræðir símenntun og bætt kjör launafólks.
Auður Árnadóttir, eigandi Fiskvals ehf. og Kjartan Már Kjartansson gæða-og starfsmannastjóri IGS fjalla um símenntun í smáum og meðalstórum fyrirtækjum. Guðjónína Sæmundsdóttir, ráðgjafi MSS kynnir Markviss.
Petra Lind Einarsdóttir, gæða-og starfsmannastjóri Hitaveitu Suðurnesja segir frá Markviss þarfagreiningu hjá HS.
Markviss-vefurinn www.markviss.com opnaður formlega af ráðherra
Ráðstefnan er á vegum MSS með stuðningi Hitaveitu Suðurnesja.

• 9. -13. september
Sýning í bókasafni Reykjanesbæjar á gögnum til sjálfsnáms og símenntunar.

• 10. -11. september
MSS framkvæmir viðhorfskönnun í fyrirtækjum til að greina álit starfsmanna til stöðu fræðslumála og uppbyggingar. Þau fyrirtæki sem hafa áhuga, hafi samband við MSS.

• 13. september
Símenntun í ferðaþjónustu - bætt ímynd Reykjaness. Málþing að Hafnargötu 57, MOA.
Málþingið hefst kl. 14:00 og er einkum ætlað aðilum í ferðaþjónustu en er öllum opið.

• 9.-13. september
Skráning á námskeið MSS í síma 421 7500 eða á netinu www.mss.is