Við getum gert mikið betur...,

- verslun og þjónusta í Reykjanesbæ skiptir okkur öll miklu máli.

Öll viljum við góða verslun og þjónustu í okkar heimabæ enda mikilvægt að hafa greiðan aðgang af þeim vörum og þjónustu sem okkar vanhagar um hverju sinni. Við viljum hafa hlutina við hendina, við viljum fjölbreytni í verslun, gæði í þjónustu, heppilegan opnunartíma og bestu verð sem þekkjast hverju sinni. Flestar búðir og þjónustufyrirtæki í miðbæ Reykjanesbæjar og við Hafnargötuna hafa verið þarna um áraraðir og við tökum þeim sem sjálfsögðum hlut - og kannski þau okkur.

Reykjanesbær er bær nærri borg eða frekar bær nærri borgum þar sem næsta borg frá Keflavík getur auk Reykjavíkur verið London, París eða New York svo dæmi séu tekin. Allt verðugir staðir heim að sækja. Það sem við höfum framyfir þessar stórborgir er að við erum bær, bærinn okkar með nálægð og persónulegt yfirbragð. Mitt mat er að við eigum að styrkja og fegra miðbæinn í kringum Hafnargötuna á næstu árum áður en við skipuleggjum ný framtíðarsvæði sem tæki áraraðir að fullgera. Gerum vel í því sem við höfum og höldum síðan áfram.

Reykjanesbær stendur framarlega á mörgum sviðum s.s. í íþróttum, tónlist, skólamálum svo eitthvað sé nefnt og höfum við alla burði til að vera til fyrirmyndar í verslun og þjónustu fyrir bæjarbúa og gesti. Og málið er einfalt því í endann segir engin neinum hvar hann eigi að versla. Verslun og þjónusta verður að standa fyrir sínu og bjóða upp á þannig verð og þjónustu að verslun heima sé sú sem fólk vil sækja og nýta. Aukning á verslun í Reykjanesbæ verður ekki til eingöngu með vilja neytanda. Við sem neytendur, verslunareigendur og bæjarfélag verðum að standa saman. Við eigum að auglýsa bæinn okkar á jákvæðan hátt og sú auglýsing þarf ekki alltaf að kosta mikla fjármuni. Með vilja og áræðni má ná mjög langt. Við verðum að vekja okkur sjálf til umhugsunar um hvað gott er að versla heima, hvað gott er að hafa úrval verslana, veitingastaða, hárgreiðslustofa o.s.frv. og hjálpa þannig verslunni að standa sig.

Við hjá Hótel Keflavík höfum ákveðið að vera jákvæð og styrkja verslun og þjónustu í okkar heimabæ með allt að 400 gistiherbergjum nú í desember. Hugmyndin gengur út að það að þeir gestir sem koma frá öðrum bæjarfélögum til Reykjanesbæjar í verslunarferð nú fyrir jólin geta notað kvittanir eða reikninga fyrir viðskiptum á allri þjónustu eða verslun í Reykjanesbæ sem greiðslu fyrir glæsi gistingu - sem sagt gist án aukagjalds í boði okkar. Við vonum að þessi hugmynd og framlag komi jólaverslun í bænum okkar vel og okkur öllum í gott jólaskap.

Kær kveðja,
Steinþór Jónsson.