Verða þeir báðir á listanum?

Nú stendur yfir fundur Kjördæmisráðs Sjálfstæðisflokksins í Suðurkjördæmi í Stapanum í Njarðvík, en fundurinn hófst klukkan 14:00. Búist er við mjög átakamiklum fundi þar sem stuðningsmenn Kristjáns Pálssonar munu leggja fram tillögu þess efnis að Kristján verði á endanlegum lista. Samkvæmt heimildum Víkurfrétta var tekist mjög á á fundi kjörnefndar sem haldinn var í gærkvöldi, en fundurinn stóð í fjórar klukkustundir og herma heimildir Víkurfrétta að kjörnefndin hafi klofnaði í afstöðu sinni um að Kristján yrði á listanum. Á fundi kjördæmisráðsins er því líklegt að tvær fylkingar muni takast á, þ.e. fylking Árna Ragnars Árnasonar og fylking Kristjáns Pálssonar. Kjartan Gunnarsson framkvæmdastjóri Sjálfstæðisflokksins og Hanna Birna Kristjánsdóttir aðstoðarframkvæmdastjóri flokksins mættu á fundinn sem nú fer fram í Stapa.