Unglingar og kannabis - heilinn ennþá að þroskast!

Bretlandseyjar:
Vísindamenn vara við að þeim ungmennum sem reglulega neyta kannabisefna sé töluverð hætta búinn á að verða fyrir andlegum/geðrænum röskunum, síðar á lífsleiðinni. Telja þeir efnið hafa svo alvarleg áhrif á heilann að það sé talin helsta orsök geðrænna vandamála, á Bretlandseyjum í dag.
Dr. Stanley Zammit, sérfræðingur í lyfjarannsóknum, greindi nú nýlega frá rannsóknum sínum á ráðstefnu BUBA Foundation. Þar sýndi hann fram á að þau ungmenni sem notað höfðu kannabisefni allt að 50 sinnum eða oftar fyrir 18 ára aldur væru þrefalt líklegri til að þróa með sér geðvandamál síðar á ævinni en aðrir, þar sem heili þeirra væri ennþá á þroskastigi og því berskjaldaðri fyrir eyðingarmætti efnisins. Töluverðar líkur væru því á að efnið hefði alvarleg áhrif á þroska unglinga sem neyta þess. Þær væru þó töluvert minni hjá þeim sem notað höfðu efnið 10 sinnum eða sjaldnar fyrir 18 ára aldur.
Dr. Zammit benti því jafnframt á að auðveldlega væri hægt að koma í veg fyrir að fjöldinn allur af ungmennum skaðaðist varanlega ef efnið væri ekki í boði á meðal þeirra. Í ljósi þessa hljóti ofangreindar niðurstöður að vera mjög mikilvægar, ekki eingöngu frá heilbrigðislegu sjónarmiði heldur einnig félagslegu. Vegna rannsókna sinna hefur Dr. Zammit nú nýverið fengið viðurkenningu og styrk til enn frekari rannsókna á efninu en aðrar nýlegar rannsóknir hafa einnig sýnt fram á sterk tengsl milli neyslu kannabisefna og aukinnar áhættu á öðrum heilsufars- og félagslegum vandamálum. Aðrar viðvaranir vísindamanna um skaðsemi kannabis hafa leitt í ljós, eftir miklar rannsóknir á eituráhrifum þess, að THC (tetrahydrocannabinol), sem er virka vímuefnið úr plöntunni, ákvarðar vímuna með því að hafa áhrif á efni í heilanum, sem senda boð frá einni frumu til annarrar. Eiturefnið THC er eftir vinnslu mun sterkara en það var fyrir nokkrum áratugum og skaðsemin því að sama skapi mun meiri.

Umræðan um lögleiðingu
Í byrjun s.l. árs var samþykkt á breska þinginu að færa kannabisefnin niður úr áhættuflokki B yfir í flokk C. Efnið flokkast því nú m.a. með sterum, róandi lyfjum og sterkum verkjalyfjum, sem allt eru lögleg en lyfseðilsskyld. Nýju lögin heimila þó ekki ungmennum undir 18 ára aldri að nota kannabisefni.
Gríðarlegt magn kannabisefna er árlega notað á Bretlandseyjum. Kannanir hafa leitt í ljós, að þriðjungur allra 15 ára ungmenna hafa prófað efnið. Háværar raddir eru uppi um, í þjóðfélaginu, að ítarleg rannsókn hefði átt að hafa farið fram, áður en lögunum var breytt þann 24. janúar 2004. Þeirri rannsókn hefði svo átt að hafa verið fylgt eftir, með fræðslu og forvörnum. En fram hefur komið að misbrestur hafi orðið á þeirri eftirfylgni.
Helstu fylgismenn breytinganna töldu tíma lögreglunnar betur varið í að eltast við þá sem meðhöndluðu sterkari fíkniefni. Með breytingunum varð aðgengi því einfaldara að efninu ásamt því að raddir fyglismanna fyrir skaðleysi þess, urðu háværari.
„Hins vegar, eftir einungis rúmlega árs reynslu af nýju löggjöfinni, telur Tony Blair, forsætisráðherra, að nauðsynlegt sé að endurskoða hana. Hún hafi svo ekki verði um villst gefið út röng og villandi skilaboð til ungmenna og breytt ástandi þar í landi, til hins verra. “

HLÚUM AÐ ÆSKUNNI
BYGGJUM HENNI BJARTA
FRAMTÍÐ!

Þýtt og staðfært að hluta
úr bresku pressunni.

Reykjanesbær, nóvember 2005

Elías Kristjánsson,
foreldri og áhugamaður um
fíkniefnaforvarnir.