Tími til að fagna

Ágætu íbúar.
Eftir fjögura ára forystu í Reykjanesbæ leggjum við Sjálfstæðismenn verk okkar í dóm kjósanda. Á þessum stutta tíma hefur uppbygging og fegrun bæjarins aldrei verið meiri sem hefur m.a. skilað sér í 3,8% fjölgun íbúa, góðri stöðu í atvinnumálum og nýjum tækifærum á öllum sviðum. Umhverfið hefur tekið algjörum stakkaskiptum en þær framkvæmdir eru að skila sér í mjög jákvæðri umræðu um bæjarfélagið um allt land. Einu neikvæðu raddirnar sem heyrast í dag um bæjarfélagið okkar eru frá sambræðingarflokki úr minnihluta bæjarstjórnar. Þannig má með sanni segja að kosningarnar á morgun snúist um hvort menn séu sáttir eða ósáttir með bæinn sinn. Þeir sem eru sáttir og vilja halda áfram á sömu braut setja X við D.

Á síðustu dögum hefur áróður andstæðinga Sjálfstæðisflokksins verið með hreinum ólíkindum. Fullyrðingar um slæma fjárhagsstöðu og gjaldþrot bæjarfélagsins í náinni framtíð er það eina sem sambræðingarflokkurinn hefur fram að færa. Engar tillögur, engin framtíðarsýn, engin gleði eða ánægja með tækifærin sem bíða okkar – engin ánægja með þær miklu framkvæmdir sem tekist hefur að ljúka á síðasta kjörtímabili eins og Hafnargötuna, Íþróttaakademíuna, Vatnaveröldina o.s.frv.

Látum ekki hræðsluáróður neikvæðra einstaklinga um framtíð bæjarins hafa áhrif á ákvörðun okkar á kjördag. Eftir nokkra klukkutíma opna kjörstaðir og kjósendur kjósa nýja framtíð í Reykjanesbæ. Við Sjálfstæðismenn biðjum um ykkar aðstoð til að tryggja áframhaldandi uppbyggingu og jákvæða framtíðarsýn.

Verum stolt með Reykjanesbæ og setjum við X við D.

Steinþór Jónsson
frambjóðandi Sjálfstæðisflokksins.