Tími samstöðu er runninn upp!

Langt er síðan jafn hart hefur verið sótt að Sjálfstæðisflokknum og forystumönnum hans. Nýjar baráttuaðferðir sem ekki byggja á málefnalegum skoðanaskiptum hafa verið teknar upp. Sjálfstæðisflokkurinn hefur aldrei og mun aldrei beita slíkum aðferðum og svarar því með málefnalegum rökfærslum. Ríkisstjórnir Davíðs Oddssonar hafa umbreytt samfélagi okkar gríðarlega og mörg áratuga gömul baráttumál hafa loks náðst fram. Nægir þar að nefna einkavæðingu ríkisfyrirtækja, skattalækkanir, jöfnun atkvæðisréttar og umbætur og aukið frelsi á flestum sviðum þjóðlífsins. Menn uppskera eins og þeir sá
Starfið innan stjórnmálaflokkanna er hópvinna. Innan hópsins uppskera menn eins og þeir sá. Því miður eru dæmi í íslenskri flokkapólitík að þeir sem ekki sætta sig við eigin uppskeru kenna öðrum um og fara í sérframboð. Einkenni slíkra framboða er það að þau njóta mikillar athygli í upphafi en fjara síðan hægt og rólega út. Aðalástæða þessa er sú að framboðin eru byggð á persónum en ekki grundvallarstefnumálum sem lifa áfram þótt einstaklingar komi og fari. Hagur heildarinnar af slíkum framboðum er því oft lítill sem ekki neinn og atkvæðunum mætti oft allt eins henda.

Samstaða um frábæran lista er lykilinn
Uppstillingarnefnd Sjálfstæðisflokksins í Suðurkjördæmi lauk í fyrra góðu starfi þar sem stillt var upp öflugum lista sem endurspeglar allt kjördæmið og ólíka hópa samfélagsins. Sá tuttugu manna listi var staðfestur með tuttugu atkvæðagreiðslum á fundi kjördæmisráðs flokksins að loknu starfi uppstillingarnefndar. Þar sannaði góð samvinna heildarinnar sig. Þær staðreyndir að ekki er sæti fyrir alla áhugasama á lista Sjálfstæðisflokksins og sótt er hart að flokknum með nýjum baráttuaðferðum mega ekki verða til þess að sá mikli árangur sem náðst hefur á síðustu þremur kjörtímabilum sé í hættu. Samstaða allra Sjálfstæðismanna og áhugasamra um áframhaldandi batnandi lífskjör er lykilatriði í kosningabaráttunni sem framundan er og á kjördag. Hagur heildarinnar en ekki einstakra manna er hér aðalmálið. Brestur í samstöðu Sjálfstæðismanna má ekki vera áframhaldandi vatn á myllu pólitískra andstæðinga. Styðjum Sjálfstæðisflokkinn og tryggjum þannig áframhaldandi framþróun og uppbyggingu samfélagsins.

Georg Brynjarsson,
Formaður Heimis, félags ungra sjálfstæðismanna í Reykjanesbæ