Tilfinningar, rök og trúverðugleiki

Á síðustu dögum hefur þessum hugtökum verið fleygt fram og til baka í fjölmiðlum og hefur sjálfstæðismönnum verið sérstaklega mikið niðri fyrir. Þeir hafa lagt mikið á sig til að sanna hversu trúverðugir þeir eru í sínum málflutningi, meira að segja hefur Böðvar Jónsson, brotist fram á ritvöllinn til að skamma okkur í stjórnarandstöðunni fyrir það að leyfa okkur að andmæla bæjarstjóranum.
Í viðræðum mínum síðustu daga við allmarga bæjarbúa er það merkilegt að það setja ekki allir samasemmerki á milli gjörða Sjálfstæðisflokksins í bæjarstjórn og hins geðþekka bæjarstjóra. Árni Sigfússon er oddviti sjálfstæðismanna sem vilja félagslega kerfið út og vilja leggja niður flest allt sem styður jöfnuð og samfélagslega aðstoð í þessu sveitarfélagi sem og í landsmálunum almennt og það má Böðvar eiga að hann hefur margoft staðfest þetta viðhorf í umræðum í bæjarstjórn.

Háskólanemi borgar 25000 krónum meira í Reykjanesbæ
Það sem verst hefur orðið úti s.l. 4 ár hér í Reykjanesbæ eru velferðarmál fjölskyldunnar. Þjónustukostnaður fjölskyld-unnar er hér samkvæmt könnunum ASÍ mun hærri en víðast á höfuðborgarsvæðinu og þó víðar væri leitað. Hér stefnir í einkarekstur á mörgum sviðum og þar eru sjálfstæðismenn sjálfum sér trúir. Samkvæmt upplýsingum frá nema sem er nýfluttur hingað í bæjarfélagið og býr hér í nemendaíbúð er viðkomandi að greiða 25.000.- kr. meira hér á mánuði fyrir húsnæði og leikskóla en í Reykjavík. Við getum byggt upp með einkarekstri en gleymum því ekki að einkarekstur kallar á arðsemi sem í sjálfum sér er eðlilegt. En ef ekki kemur til framlags frá hinu opinbera í samfélagslega uppbyggingu þá erum við komin í amerískt hagkerfi þar sem bilið eyskt sífellt. Er það sem við viljum hér í Reykjanesbæ? Viljum við úthýsa öðrum en þeim sem hafa peninga, burt séð frá því hvernig þeir hafa aflað þeirra eða tekið að láni?

Óháðir aðilar styðja gagnrýni okkar á Fasteing hf.
Okkur A-listafólki hefur verið núið um nasir að hafa séð að okkur varðandi rekstur Fasteignafélagsins. Þeir viðskiptafræðingar sem fram hafa komið með fréttaskýringar á síðustu dögum geta þó ekki hrakið þá útreikninga sem við höfum sett fram sem styðja það að hagstæðara sé að skoða okkar leiðir og endurskoða fasteingamálin í Reykjanesbæ. Ég er ekki í nokkrum vafa um að sjálfstæðismenn eiga eftir kosningar að kanna þær leiðir sem við erum að benda á og verði þeim það að góðu.
Ágæti kjósandi. Við hjá A-listanum erum sönn í því sem við segjum, sókn eftir vinsældum stjórnar ekki málfultningi okkar. Við kappkostum að vera sjálfum okkur trú. Við nýtum til þess bæði tilfinningar og rök í þeirri von að uppskera trúverðugleika.

Sveindís Valdimarsdóttir skipar 3. sæti A-listans