Til sigurs með Samfylkingunni

Það skiptir máli hverjir stjórna. Það er mikilvægt að gera breytingar á stjórn bæjarmála í Reykjanesbæ. Meirihluti Sjálfstæðisflokks og Framsóknarflokks, sem hefur verið við völd í bæjarfélaginu síðustu tólf árin er orðinn þreyttur og fólk er orðið þreytt á honum.
Þá er kominn tími til að breyta, segir Ólafur Thordersen, frambjóðandi í prófkjöri Samfylkingarinnar í Reykjanesbæ.Ég hef starfað sem einn af fjórum bæjarfulltrúum Samfylkingarinnar
í minnihluta bæjarstjórnar Reykjanesbæjar á því kjörtímabili sem nú
er að ljúka. Þar höfum við veitt meirihlutanum strangt og gagnrýnið
aðhald, en með málefnalegum hætti. Hins vegar hafa velflestar okkar
tillögur, sem til bóta hafa horft fyrir bæjarfélagið, umsvifalaust
verið felldar af meirihlutanum. Meirihlutamenn hafa litið þannig á að
þeirra sé mátturinn og dýrðin og ekki þurfi að hlusta á viðhorf okkar
bæjarfulltrúa Samfylkingarinnar, né heldur raddir bæjarbúa. Þannig er
það því miður oft, þegar sami meirhluti hefur setið of lengi.
Langvarandi valdaseta framkallar hættuna á spillingu og einræði. Því
þarf að breyta. Það þarf að kalla Samfylkinguna til verka við stjórn
bæjarmála í Reykjanesbæ.
Samfylkingin er lýðræðislegur flokkur og vill samráð og samstarf
við fólk um framgang mála. Það er þess vegna sem Samfylkingin efnir
til opins prófkjörs næstkomandi laugardag, 23.febrúar, þar sem
bæjarbúar geti valið frambjóðendur í efstu sæti á lista flokksins í
kosningunum í vor. Það gera helstu andstæðingar okkar ekki - þeir raða
á jötuna eftir ákvörðunum örfárra klíkubræðra.
Ég gef kost á mér í 2.sætið á lista flokksins í prófkjörinu á
laugardag og óska eftir stuðningi til þess. Ég vil vera í sigurliði
með góðu fólki.
Vertu með í sókn til sigurs. Mættu í prófkjörið á laugardaginn.
Ólafur Thordersen
bæjarfulltrúi.