Það er tækifæri til breytinga

Ljóst virðist vera að enn um stund verði frestun á uppbyggingu margra þeirra stóru atvinnutækifæra sem beðið hefur verið eftir. Það þýðir lítið að eyða orkunni í að deila um hversvegna eða hver ber sök á því, þegar ljóst er að mörgum þeim fyrirtækjum sem borið hafa upp atvinnulíf á svæðinu blæðir út hægt og rólega. Það ber að sinna þeim sjúklingi sem sannanlega er sjúkur nú í stað þess að bíða þess að annar heilbrigður birtist sem tekið geti stöðu hans.

Nú er ekki tíminn til þess að fara í stórkarlalegar ritgerðarsamkeppnir um þúsundir atvinnutækifæra eins og boðað var til í grein bæjarstjóra Reykjanesbæjar hér á vef Víkurfrétta í síðustu viku. Við verðum að horfa á stöðuna eins og hún er um leið og við höfum í huga hver staða þeirra atvinnuverkefna er sem stærstar hafa fengið fyrirsagnirnar. Þau eru flest stopp eða í hægagangi.

Við höfum á undanförnum árum horft til byggingariðnaðarins hér á á Suðurnesjum með stolti. Stór og sterk verktakafyrirtæki í bland við framleiðslufyrirtæki í húsgagna og innréttingariðnaði hafa verið eitt af einkennum atvinnulífs á svæðinu. Þeirra stöðu þurfum við að styrkja og finna þeim verkefni við hæfi. Við verðum að breyta þeim hugsunarhætti okkar að nóg sé að bjóða stöðugt ný fyritæki velkomin. Við þurfum að sinna þeim sem fyrir eru. Það verðum við að gera í samfélagslegri sátt með aðkomu allra þeirra aðila sem til þess eru bærir.

Við erum í raun heppin. Við höfum verkefni sem þarf að klára og þó þau skapi ekki hvert um sig þúsundir starfa, eru þau þó verkefni sem þar að sinna. Hjúkrunarheimilið þar sem þegar er komin fjármögnun ríkisins að hluta bíður. Það verkefni þarf að klára. Þar gætu skapast kannski 20 störf í tvö ár. Hljómahöllina þarf að innrétta. Finna þarf leið til fjármögnunar þess verkefnis. Þar gætu einnig skapast nokkur fjöldi starfa og verkefni fyrir þau fyrirtæki sem nú þurfa hvað mest á að halda.

Nú veit maður svo sem ekki alveg hver hin raunverulega staða Reykjanesbæjar er þessa stundina, en ljóst er að þrátt fyrir allt og hvaða skoðum sem maður hefur á því á bærinn skuldabréf. Skuldabréfið í HS Orku sem á að vera til greiðslu árið 2016. Er hægt að nýta það til fjármögnunar á þeim verkefnum sem nú eru ókláruð, en þyrftu svo sárlega að komast í gang til að fá hjól atvinnulífsins til þess að snúast á nýjan leik? Væri það unnt værum við þó að sýna í verki að við sem bæjarfélag eru að gera allt það sem í okkar valdi stendur til að vinna bug á því ástandi sem hér er.

Við verðum sem fyrst að koma okkur í þá stöðu að krafturinn sem í samfélaginu býr fari í gang. Framundan er vetur sem gæti farið innnatómt karp um það sem gæti orðið, eða veturinn sem við ákváðum að standa saman og láta hlutina verða. Það er undir okkur komið , sveitarstjórnarmenn forsvarsmenn atinnulífsins og reyndar almennings alls að koma sér saman um samfélagslega sátt og setjast nú niður til að finna þær lausnir sem að okkur snúa. Við verðum að viðurkenna að sú þunga staða sem bæjarfélagið nú í kallar á ný viðhorf til lausnar. Við verðum jafnvel þó sárt sé að leggja til hliðar um stund hið pólitíska dægurþras. Við verðum að sýna samstöðu um verkefni sem byggir á þeim raunveruleika sem við búum við nú um stundir. Það er tækifæri til breytinga.

Með bestu kveðju
Hannes Friðriksson