Tækifæri til breytinga

Það er einungis á fjögurra ára fresti sem íbúar sveitarfélaga hafa tækifæri til að velja sér fulltrúa í sveitarstjórn. Það er því mikilvægt að vanda valið. Sandgerðingar eiga í fyrsta skipti kost á því að kjósa S-lista Samfylkingar og óháðra sem boðar nýja tíma í stjórnun Sandgerðisbæjar.

S-listinn leggur áherslu á virkt lýðræði og gott samráð við íbúa bæjarins. S-listinn leggur áherslu á að í Sandgerði verði veitt fyrsta flokks þjónusta um leið og ráðdeildar er gætt í rekstri. S-listinn leggur áherslu á trausta fjármálastjórnun sem auðveldar uppbyggingu og framfarir fyrir Sandgerði og Sandgerðinga.

S-listinn hefur sett fram 53 áherslupunkta sem hann ætlar að vinna að á næsta kjörtímabili fái hann umboð til að starfa í meirihluta. Áherslupunktarnir eru afrakstur af metnaðarfullri málefnavinnu sem fjöldi fólks kom að og eiga það allir sameiginlegt að vera raunhæfir og framkvæmanlegir.

Það er hlutverk bæjaryfirvalda að ganga í farabroddi þeirra sem hafa trú á framförum og uppbyggingu í heimabyggð. Sóknarfærin sem bjóðast eru mörg og það þarf kraftmikla bæjarstjórn til að nýta þau. S-listinn hefur á að skipa öflugum hópi fólks sem getur leitt Sandgerði til nýrra tíma.

Kjósendur þurfa að meta hvort halda eigi í gamla stjórnunarhætti eða hvort hleypa eigi nýju lífi í stjórnun Sandgerðisbæjar. Þeir sem ekki sjá ástæðu til breytinga geta valið á milli K-listans og D-listans, enda leiða báða listana einstaklingar sem stýrt hafa málum í Sandgerði á annan áratug. Þeir sem vilja sjá breytingar á stjórnun Sanderðisbæjar eiga hins vegar skýrt val, þeir kjósa S-lista Samfylkingar og óháðra.

Ég bið kjósendur í Sandgerði að hafa það hugfast að einungis atkvæði til S-listans getur tryggt breytingar og nýja tíma í stjórnun Sandgerðisbæjar. Núna er tækifæri til að breyta í Sandgerði. Nýtum það og setjum x við S á kjördag.

Ólafur Þór Ólafsson
skipar 1. sæti S-listans í Sangerði