Styðjum Ragnheiði Elínu í 1. sæti

Ragnheiður Elín er oddviti þingflokks Sjálfstæðisflokksins í Suðurkjördæmi.  Hún er öflugur talsmaður atvinnulífsins sem er undirstaða velferðar í samfélaginu okkar.

Atvinnumálin
Ragnheiður hefur lagt áherslu á mikilvægi atvinnumála. Ferðaþjónustan er ört vaxandi og ein lykilatvinnugrein okkar og sú atvinnugrein sem mjög margir íbúar á Suðurnesjum starfa við.  Álögur núverandi stjórnvalda á greinina geta hamlað vexti þessarar ungu atvinnugreinar og haft árif á fjölda starfa.
Í fjárlagaumræðu Alþingis lagði Ragnheiður sitt lóð á vogarskálarnar þar sem hún talaði gegn auknum álögum á ferðaþjónustu sem fagaðilar hafa bent á að hamli vexti og verðmætasköpun innan greinarinnar.

Mikilvægi menntamála
Menntamál eru annar málaflokkur sem Ragnheiður hefur sýnt í verki að hún sýnir eindreginn stuðning.  Þegar núverandi stjórnvöld ætluðu að skerða mjög fjárveitingar til Fjölbrautaskóla Suðurnesja var það ekki hvað síst fyrir tilstuðlan stjórnarandstöðunnar og framgöngu Ragnheiðar að frá þeirri skerðingu var fallið.  
Ég treysti Ragnheiði Elínu til að vinna áfram ötullega að hagsmunum okkar og leiða Sjálfstæðisflokkinn til sigurs í Suðurkjördæmi.  Ég hvet ykkur til að taka þátt í prófkjöri Sjálfstæðisflokksins þann 26. janúar og tryggja Ragnheiði Elínu góða kosningu í 1. sætið!

Magnea Guðmundsdóttir,
bæjarfulltrúi Sjálfstæðisflokksins í Reykjanesbæ.