Stór tímamót hjá Hitaveitu Suðurnesja
Aðalfundur Hitaveitu Suðurnesja var haldinn föstudaginn 30. mars í Eldborg í Svartsengi en fundargestir voru um 200. Að loknum aðalfundi var haldinn stofnfundur Hitaveitu Suðurnesja hf. en í henni sameinuðust HS og Rafveita Hafnarfjarðar. Ingólfur Bárðarson, fráfarandi stjórnarformaður HS, flutti eftirfarandi ávarp á fundinum og heiðraði fyrsta forstjóra HS, Ingólf Aðalsteinsson.„Í dag eru stór tímamót hjá H.S. sennilega þau stærstu frá því að Hitaveita Suðurnesja var stofnuð 1974. Þetta er síðasti aðalfundur H. S. með þessu rekstrarformi, á morgun verður nafn H. S. Hitaveita Suðurnesja HF.
Samruni Hitaveitu Suðurnesja og Rafveitu Hafnarfjarðar kominn endanlega í höfn eftir langa fæðingu. Alþingi okkar samþykkti þann 15. mars sl. samrunann og að Hitaveita Suðurnesja yrði rekið sem hlutafélag eða Hitaveita Suðurnesja HF.
Ég vil á þessum tímamótum bjóða nágrönnum okkar frá Rafveitu Hafnarfjarðar velkomna sem hluthafa í Hitaveitu Suðurnesja hf og einnig bjóða starfsmönnum Rafveitu Hafnarfjarðar velkomna til starfa.
Ég veit að þetta verður eitt mesta framfaraspor sem Hitaveita Suðurnesja hefur stigið með þessum breytingum og munum við tryggja öruggt rekstraröryggi í orkumálum fyrir þetta svæði til næstu framtíðar og verðum við væntanlega tilbúin í frekari samkeppni eftir að orkusala verður gefin frjáls.
Næg orka er hjá okkur í jörðu hér í Svartsengi, Reykjanessvæðinu og síðan í Trölladyngju og munum við væntanlega sjá fyrir okkr í framtíðinni nýtt orkuver rísa á Trölladyngjusvæðinu og myndi það líklegast tengjast orkuverinu í Svartsengi til að tryggja rekstaröryggi Svartsengis til framtíðar.
Hitaveita Suðurnesja hefur verið eitt öflugasta fyrirtæki hér á Suðurnesjum nánast frá stofnun. Hún hefur verið virkur aðili að ýmsri atvinnuþróun hér á Suðurnesjum ogum land allt og hefur fætt af sér til dæmis Bláa Lónið og mörg önnur góð fyrirtæki.
Við hér á Suðurnesjum gætum spurt í dag hvernig staða okkar væri, hefði þessir framsýnu sveitarstjórnarmönnum á Suðurnesjum ekki stofnsett Hitaveitu Suðurnesja á sínum tíma, værum við með olíukyndingu og hæsta raforkuverð landsins. En í dag erum við með lægsta orkuverð landsins.
Ég vil nota tækifærið og þakka öllum þeim sem lagt hafa hönd á plóginn við að gera Hitaveitu Suðurnesja að því blómlega fyrirtæki sem það er í dag og þar vil ég nefna frumherjanna og síðan það góða starfsfólk sem valist hefur til fyrirtækisins frá stofnun þess. Ef Hitaveita Suðurnesja hf. ber gæfu til þess að reyna að halda þeim starfsmönnum sem vinna við fyrirtækið í dag, tel ég framtíð H.S. mjög bjarta.
Þar sem ég læt nú af störfum sem stjórnarformaður H.S eftir mjög öflugt og árangursríkt starf stjórnar, vil ég nota tækifærið og þakka Júlíusi Jónssyni forstjóra og Alberti Albertssyni aðstoðarforstjóra og öðrum starfmönnum Hitaveitu Suðurnesja fyrir mjög gott og árangursríkt samstarf. Einnig vil ég þakka stjórn Hitaveitu Suðurnesja fyrir samstarfið og ritara stjórnarinnar Birni Stefánssyni.
Í lok aðalfundar heiðraði stjórnarformaður, Ingólf Aðalsteinsson fyrsta forstjóra H.S.
Góðir fundarmenn.
Ingólfur Aðalsteinsson fyrrverandi forstjóri H.S er fæddur 10 október 1923 á Hamraendum í Dalasýslu. Eiginkona Ingólfs er Ingibjörg Ólafsdóttir bókavörður og eiga þau sex börn.
Menntun Ingólfs er stúdentspróf frá Menntaskólanum á Akureyri 1946, cand.pbil frá Háskóla Íslands 1947. Útskrifaður verðurfræðingur 1949, framhaldsnám í veðurfræði í Svíþjóð 1964.
Starfsferill veðurfræðingur á Veðurstofu Íslands 1949-1975, framkvæmdarstjóri og síðar forstjóri H.S. 1975 til 1992.
Önnur störf: Fulltrúi Sjálfstæðisflokksins í hreppsnefnd og síðar í bæjarstjórn Njarðvíkur 1962- 1982. Hefur átt sæti í kjördæmisráði Sjálfstæðisflokksins í Reykjaneskjördæmi um árabil. Hefur gegnt mörgum störfum á vegum Lionshreyfingarinnar sem formaður, svæðisstjóri og umdæmisritari.
„Stjórn Hitaveitu Suðurnesja fannst það við hæfi að heiðra fyrsta forstjóra okkar á þessum stóru tímamótum með því að láta útbúa lágmynd af honum og voru útbúnar 2 lágmyndir, fær Ingólfur eina til eignar en hin mun verða sett upp á viðeigandi stað hjá Hitaveitu Suðurnesja.
Eins og ég gat um í kynningu um Ingólf Aðalsteinsson hér á undan var hann forstjóri Hitaveitu Suðurnesja á árunum 1975 til 1992 og sem þakklætisvott fyrir góð frumherjastörf í þágu Hitaveitu Suðurnesja, færi ég þér þessa lágmynd til eigna með innilegu þakklæti frá okkur öllum“, sagði Ingólfur Bárðarson fráfarandi stjórnarformaður og sleit síðan fundinum.
