Spurt út í samskipti Víkurfrétta og Reykjanesbæjar

Samskipti Víkurfrétta og Reykjanesbæjar komu til tals á fundi bæjarstjórnar í gærkvöldi.

Jóhann Geirdal, fulltrúi Samfylkingarinnar, spurði Árna Sigfússon, bæjarstjóra, hvort rétt sé að Reykjanesbær hafi greitt fjölmiðlum fyrir að fjalla á jákvæðan hátt um skóla- og menntamál. Ef svo væri, hversu háa upphæð hafi verið um að ræða og hvort hliðstæðir samningar væru í fleiri málaflokkum.

Árni játaði því að bærinn hafi greitt Víkurfréttum fyrir aukna umfjöllun um skólamál. „Með því vorum við fyrst og fremst að hvetja til meiri umræðu með því að fá meira svæði í blaðinu. Við vildum meðal annars vekja athygli á fyrrum nemendum í Fjölbrautarskóla Suðurnesja sem hafa gert garðinn frægan til að sýna krökkunum hérna hvað fólk gæti gert með menntun frá Fjölbrautarskólanum. Þá vildum við líka sjá aukna umfjöllun um grunnskólamál og höfum sagt að við viljum sjá að umræða um skólamál sé ekki minni en umræða um íþróttir hér í bæ.“
Árni sagði reynsluna af samningnum vera góða og mæltist til þess að samstarfinu yrði haldið áfram. Hann var ekki með nákvæma upphæð á takteinum, en hann sagði að honum væri ekki kunnugt um aðra samninga af þessari gerð.
VF-mynd/Þorgils Jónsson: af fundinum í gær