Sólon framsókníus?
Var það ekki Sólon Íslandus söguhetja Davíðs Stefánssonar í samnefndri bók sem reiknaði tvíbura í konu? Annað barnið svart og hitt hvítt.Jú það gerðist fyrir margt löngu. En nú reyna þeir félagar Eysteinn Jónsson og Kjartan Már Kjartansson, að endurtaka leikinn og bæta raunar betur, því þeir reikna þríbura í Framsóknarflokkinn í Suðurkjördæmi.Já sækjast sér um líkir sannast þar, aumingja framsókn er að gufa upp, fátt eftir nema svikin loforð, sviknar hugsjónir og fólkið í landinu situr eftir með sárt ennið. Framsóknarflokkurinn geldur þess núna, að ferill þeirra er markaður af spillingu, ístöðuleysi og valdahyggju og gamli formaðurinn flúinn frá stýrinu svona rétt áður en flokkurinn strandar á skeri svikinna loforða.
Spillingamál flokksins er óþarfi að tíunda hér enda þyrfti heila blaðopnu til þess og engin furða að kjörorði þeirra nú “Árangur áfram –ekkert stopp hafi unga fólkið snúið upp í “Áfram spilling – ekkert stopp.
Nei það sem fólk man best frá Framsókn nú, er biðlistarnir sem sjúkum, öldruðum og fötluðum er gert að una og hvíla þungt á fólki, stórum sem smáum fjölskyldum og harðast á einstaklingum, hvar eldurinn brennur heitast.
Suðurnesjamenn þurfa ekki reiknimeistara af sömu gráðu og Sólon Íslandus. Þeir vita að með samstilltu átaki tekst að koma Guðnýju Hrund á Alþingi, ungu konunni sem vann nánast kraftaverk sem sveitarstjóri norður á Raufarhöfn, við að rétta af fjárhag sveitarfélagsins þar á síðast kjörtímabili, þar fer ung vel menntuð kona sem sannarlega á erindi á Alþingi, kona sem ekki verður til uppfyllingar á lista, heldur kona sem mun verja hagsmuni Suðurnesjamanna. Nú er lag- nú er þörf á kraftmiklum þingmanni frá Suðurnesjum.
Nei, framsóknarmenn eignast ekki þríbura í Suðurkjördæmi að þessu sinni og ekki heldur tvíbura, hugsanlega einbirni, sem verður og er ágætis skemmtikraftur, en aldrei leiðtogaefni eins og sagan sannar því allan kjark vantar þegar á þarf að herða.
Það sakar ekki að benda fólki á að skoðanakannanir að undanförnu hafa sýnt svo ekki verður um villst að landbúnaðarráðherrann rétt hangir inni, það er nú allt og sumt.
Ágætu kjósendur á Suðurnesjum, með krafti og einbeitni og samstöðu mun okkur takast að koma Guðnýju Hrund Karlsdóttur á þing en ekki með einhverjum reikningskúnstum.
Hilmar Hafsteinsson
