Skjálfti sveitarstjórans í Garði

Það er athyglisvert að fylgjast með þeim viðbrögðum F – listamanna í Garði við þeirri staðreynd að Ellert Eiríksson bæjarstjóri Reykjanesbæjar geti vel hugsað sér að setjast á ný í sveitarstjórastólinn hér í Garði ef H – listinn fái nægt kjörgengi í vor. Í Vikurfréttum birtist grein eftir Sigurð Jónsson sveitarstjóra í Garði þar sem hann lýsir undrun sinni á að Ellert vilji stuðla að því að koma honum og meirihlutanum frá. Þar kemur hann inn á þessa afdráttarlausu yfirlýsingu Ellerts um áhugann, en segir svo um leið, að kjósendur í Garði eigi rétt á svörum frá Ellerti hvort hann ætli í kosningaslaginn eða ekki. Við lestur greinarinnar kemur glögglega fram að menn eru farnir að óttast um sætin sín sem segir manni það að F – listamenn vita að Ellert er hæfastur í sveitarstjórastólinn. Á Ellerti er engan bilbug að finna. Hann getur hugsað sér að koma ef við getum boðið honum starfið.
Ég verð því að minna núverandi sveitarstjóra á það hvernig hann komst í sveitarstjórastólinn hér. Hann var búsettur í Vestmannaeyjum og var ráðinn til starfa, hann vann enga kosningabaráttu til að öðlast starf sitt. Afhverju má ekki gera slíkt hið sama á nýjan leik? H – listinn hefur mikinn metnað fyrir Garðinum og öllu þeim framkvæmdum sem framundan eru og stendur að þeim öllum.. Til þess að öll þessi verkefni verði gerð á sem bestan og hagkvæmnastan hátt þarf til þess sveitarstjóra sem býr yfir mikilli reynslu og þekkingu á þessum sviðum og hann er því miður vandfundinn hér í Garði.
Auk þess er vert að minnast á það hvort ekki sé um siðblindu að ræða að ráðinn sveitarstjóri skuli með reglulegu millibili skrifa greinar í svæðisblöðin þar sem hann hvetur Garðbúa til að kjósa F – listann.
Ég er ekki svo viss um það að allir Garðbúar séu á eitt sáttir við að skattgreiðslur þeirra fari í að borga kosningastjóra F – listans ráðherralaun. Sigurður Jónsson hefur ákveðið að vera bara sveitarstjóri sumra Garðmanna en ekki allra eins og hann var ráðinn til.
Einnig vakti athygli mína grein sem sveitarstjóri skrifaði í Morgunblaðið fös. 19 apríl sl. þar sem hann lýsir miklum metnaði F – listans í skólamálum. Gerðaskóli er einni skólinn á Suðurnesjum sem ekki enn er einsetinn. Aðstaða starfsfólks er slík að aðeins brot af starfsfólki getur fengið sér sæti í frímínútum, og allir kennarar skólans hafa aðgang að einni tölvu í vinnuherbergi kennara. H – listinn hefur krafist úrbóta í þessu máli. Ég minni líka á vinnnubrögð F – listamanna í haust í úrlausnum launamála skólastjórnenda við skólann.
Ef þetta er kallaður metnaður í herbúðum F-listamanna, þá ættu kjósendur ekki að vera í vandræðum með að X-H í kjörklefanum í vor.

Siðferði - árangur - metnaður

X - H

Árni Árnason
4. sæti á lista sjálfstæðismanna og annara frjálslyndra kjósenda