SIGRÍÐUR JÓHANNESDÓTTIR SKRIFAR: SAMFYLKINGIN FYRIR FJÖLSKYLDUFÓLK
Eitt mikilvægasta mál sem tekist er á um í komandi kosningabaráttu er staða heimilanna í samfélaginu. Auðvitað standa heimilin mjög misjafnlega að vígi hvað efni snertir en þó verður að játa að sá hópur sem hefur einna minnstu úr að spila í því góðæri sem við nú lifum er ungt millitekjufólk sem er að koma yfir sig húsnæði á sama tíma og það er að ala upp börnin sín. Þetta fólk er oft mjög skuldugt og reynir að vinna alla þá vinnu sem það kemst yfir til að greiða niður skuldir en lendir þá oft um leið í hinum verstu hremmingum hvað varðar allar mögulegar tekjutengingar svo ekki sé minnst á mikinn kostnað vegna barnagæslu svo að oft ber það minna úr býtum en ætlað var. Það er mjög brýnt að draga úr þessum tekjutengingum þannig að fólk lendi ekki í þeim mun verri fátækragildru sem það leggur á sig meiri vinnu. Þessu til áréttingar ætla ég að segja ykkur sögu ungra hjóna sem til mín leituðu nú á útmánuðum í örvinglan sinni. Þessi hjón höfðu fest kaup á íbúð fyrir um það bil 10 árum. Bæði hjónin höfðu ekki einungis haft fulla vinnu heldur alla þá yfir og aukavinnu sem þau höfðu komið höndum yfir í þessi ár. Þrátt fyrir mikinn kostnað vegna barnagæslu misstu þau barnabætur vegna tekjutengingar og jafnframt minnkuðu vaxtabætur þrátt fyrir vaxandi skuldir. Loks fór svo að þrátt fyrir allt þetta vinnuálag, allt það sem þau höfðu lagt á fjölskylduna til að þau gætu haldið húsnæðinu, misstu þau það á nauðungaruppboði og sátu nú uppi með sárt ennið, á götunni með 4 börn og miklar skuldir sem þau munu þurfa að glíma við að greiða upp á næstu árum. Því miður er það svo að saga þessara ungu hjóna er ekki einsdæmi. Það er margt ungt fólk sem berst við að halda í horfinu því skuldaskrýmsli sem stöðugt ógnar fjölskyldunni en lendir stöðugt í þrengri stöðu eftir því sem fólk leggur meira á fjölskylduna. Því veldur mjög hátt vaxtastig í landinu og verðbæturnar sem bankakerfið rígheldur í og græðir á tá og fingri á einmitt þessu fólki sem verður að bæta við sig lánum til að borga önnur lán. Og svo ekki síst tekjutengingar ýmiss konar eins og til dæmis á barnabótum en þannig hefur á síðasta kjörtímabili ríkissjóður náð 2.2 milljörðum króna af barnafólki með því að skerða barnabætur. Það var þá markhópur, fólkið sem er að ala upp næstu kynslóð Íslendinga og er oft á tíðum að leggja á sig mikið vinnuálag til að koma húsnæði yfir fjölskylduna. Og er blygðunarlaust látið gjalda þess. Ísland er eitt Norðurlandanna með tekjutengdar barnabætur en barnabætur eru hér á landi um 40% lægri en þar tíðkast. Hvernig dettur nokkrum manni í hug að trúa þeim flokkum fyrir atkvæði sínu sem setið hafa að völdum nú í mesta góðæri Íslandssögunnar og farið svona að ráði sínu gagnvart því fólki sem það lofaði gulli og grænum skógum fyrir síðustu kosningar. Þó að þeir dragi núna úr pússi sínu á gulnuðuum blöðum kosningaloforðin sín frá síðustu kosningum þá er það auðvitað ekki nema hlægilegt. Samkvæmt opinberum tölum þá hafa skuldir heimilanna aukist um 50 milljarða á síðastliðnu ári. Auðvitað er þar að hluta til um skuldsetningu að ræða vegna eignaaukningar en vísbendingar eru um að stór hluti þessara skulda séu til komnar vegna þess að fólk tekur lán til að borga uppsafnaðar skuldir og lengir þannig aðeins í hengingarólinni. Samfylkingin hefur sett fram áætlun um að bæta hag íslenskra barnafjölskyldna en hún fær til þess umboð í komandi kosningum. Samfylkingin ætlar að afnema tekjutengingu barnabóta, Samfylkingin vill að ráðstafanir í skatta, félags- og tryggingamálum taki mið af hagsmunum fjölskyldunnar. Við viljum þannig að foreldrar geti nýtt sér ónýttan skattaafslátt barna en allar okkar áætlanir miða þó að því að varðveita stöðugleikann í efnahagsmálum sem launþegahreyfingin hefur átt mestan þátt í að skapa á undanförnum árum. Við viljum lengja fæðingarorlof í 12 mánuði.Við viljum gera samfélag okkar barnvænna. Börnin eru það dýrmætasta sem við eigum. Ágæti kjósandi. Í komandi kosningum eru í raun aðeins tveir kostir. Ef þú ert ánægður með ástand velferðarmála eins og það er í dag þá velur þú sitjandi stjórnarflokka. Ef þú vilt breyta þá áttu samleið með Samfylkingunni. Verum samferða og breytum rétt. Sigríður Jóhannesdóttir, alþingismaður.
