Samfylkingin opnar kosningamiðstöð í Reykjanesbæ
Kosningamiðstöð Samfylkingarinnar í Aðalveri Reykjanesbæ (fyrir ofan Aðalstöðina) var opnuð með pompi og pragt laugardaginn 31. mars. Stuðningsmenn S-listans fjölmenntu en mikill kraftur er í starfinu á Suðurnesjum eins og glæsilegur stofnfundur Kvennafylkingarinnar og öflugt starf Ungra jafnarmanna á Suðurnesjunum ber með sér, m.a. opnuðu UJ áhugaverða vefsíðu á dögunum - sigurlistinn.is
Félagar í Leikfélagi Keflavíkur skemmtu opnunargestum með atriðum úr revíunni stórskemmtilegu, Besta Bæ, sem LK sýnir um þessar mundir.Guðný Hrund Karlsdóttir, Suðurnesjakonan í baráttusætinu, brýndi menn til dáða sem og Lúðvík Bergvinsson og Björgvin G. Sigurðsson oddviti S-listans. Róbert Marshall og Guðbrandur Einarsson tóku lagið og stjórnuðu fjöldasöng.
Laugardagskaffi alla laugardaga og Pub-Quiz UJ
Mánudagskvöldið 2. apríl er félagsfundur í Aðalveri þar sem Róbert Marshall kynnir málefnaáherslur sem liggja til samþykktar landsfundar Samfylkingarinnar í Egilshöll dagana 13-14. apríl. Fimmtudaginn 5. apríl halda svo Ungir jafnaðarmenn Pub Quiz á Paddy´s sem hefst kl. 21:00 og eru allir velkomnir.
Kosningamiðstöðin verður opin fyrst um sinn frá kl. 17:00 til 21:00 virka daga og 10:30-14:00 á laugardögum en þá bjóða frambjóðendur uppá kaffi og kruðerí. Sími Kosningamiðstövarinnar er 421-3030, kosningastjóri í Suðurkjördæmi er Eysteinn Eyjólfsson, 698-1404 - [email protected]
