Róbert Marshall í 2.-3.sæti Samfylkingarinnar í Suðurkjördæmi

Róbert Marshall, varaþingmaður og aðstoðarmaður samgönguráðherra, hefur tilkynnt þátttöku sína í prófkjöri Samfylkingarinnar í Suðurkjördæmi og óskar eftir stuðningi í annað til þriðja sæti listans. Róbert var í þriðja sætinu, baráttusæti flokksins í kjördæminu, fyrir tveimur árum en þá vantaði einungis 56 atkvæði til að hann næði kjöri. Nú hefur hann í hyggju að rétta þann hlut.  Hann leggur áherslu á áframhaldandi samgöngubætur, breytingar á kvótakerfinu og upptöku evru með inngöngu í Evrópusambandið. Hann telur öflugt atvinnulíf og sköpun nýrra starfa bestu leiðina til að verja velferðina og fjölskyldurnar í landinu.  Róbert er fyrrverandi blaða- og fréttamaður. Upplýsingar um stefnumál hans er að finna á heimasíðunni www.marshall.is.
Prófkjör Samfylkingarinnar í Suðurkjördæmi þann 7. mars er netkosning og geta allir sem búsettir eru í kjördæminu tekið þátt.