Ríkisstjórnin hikstar á Helguvík

Þá vitum við það. Vinstri menn ætla sér að stöðva framkvæmdir við Helguvík. Meira virðist liggja á að fjölga listamönnum á ríkisstyrkjum, allt í boði VG, þótt engir fjármunir séu til. Samfylkingin treystir sér ekki til þess að koma fjárfestingasamningi um álver í Helguvík í gegnum þingið áður en þingstörfum lýkur. Fylkingin er ósamstíga í málinu. Er þetta ekki dæmigert? Skrifar
oddviti þeirra í Suðurkjördæmi upp á þetta? Sami maður og skrifar á vefinn pressan.is í gær að “...verður því ekkert hik á Helguvíkurframkvæmdum”.

Svo mörg eru þau orð hjá Björgvin G Sigurðssyni, sem ætlar nú að svíkja okkur um þennan mikilvæga samning sem er skilyrði frekari framkvæmda í Helguvík. Framkvæmda sem fela í sér atvinnu fyrir hartnær þrjúþúsund manns, innflæði gjaldeyris og traustari stoðir samfélags okkar - sem svo sannarlega veitir ekki af eins og staðan er nú. Og er kannski bæjarstjórinn í Garði sammála þessari meðferð málsins? Ætlar hún að lúffa eins og aðrir fyrir Vinstri grænum?
 
Á blekkingaleiknum aldrei að linna? Björgvin og félagar hans í ríkisstjórnarflokkunum ætla nú að eyða tækifærinu sem okkur hefur boðist til að sjá þúsundir nýrra starfa verða til á Suðvesturhorni landsins, þar sem atvinnuleysið er mest. Eyða tækifæri einstaklinga á þessu svæði til að afla tekna fyrir sig og fjölskyldur sínar. Eyða tækifæri til uppbyggingar. Eyðum ekki meiri tíma í vinstri flokka. Komum þeim frá völdum strax.

Ragnheiður Elín Árnadóttir
oddviti sjálfstæðismanna í Suðurkjördæmi