Reykjanesbær hefur ætíð verið góður bær

Á vefsíðu Víkurfrétta í gær skrifar Kristján Pálsson f.v. bæjarstjóri, þingmaður T-listans og reyndar einnig Sjálfstæðisflokksins. Kristján fer mikinn í aðdáun sinni á núverandi bæjarstjóra og telur að allt hafi hér vaknað úr dróma og allsleysi. Það má kannske benda fólki á ,að þessi sami Kristján ásamt Ellert Eiríkssyni voru bæjarstjórar hér í bæ síðustu 12 árin á undan Árna Sigfússyni 1990-2002 og greinilegt að honum sjálfum finnst nú ekki mikið til koma um afrek sín né Ellerts, ja hérna " bragð er að þá barnið finnur". Kristján segir að hér séu í byggingu yfir 1000 íbúðir, "já nú er heldur betur slegið í truntuna" eins og karlinn sagði , Árni bæjarstjóri segir á skiltinu góða við Reykjanesbrautina, að þær séu 825 samtals, hvorug talan er þó rétt því það sjá allir, sem vilja sjá að þessi fjöldi er fjarri öllu sanni ef menn aka um svæðin hér sem eru í byggingu, hús telst nú varla í byggingu fyrr en framkvæmd þess hefst,hvað sem síðar kann að verða. Þá talar Kristján um uppbyggingu fyrri tíma hér í bæ og aldrei hafi annað eins átt sér stað, hann veit líklega betur um þetta en innfæddir, sjálfur kom hann hingað fyrst árið 1990 engin furða að maðurinn leggi stund á sagnfræðinám. Þá ræðir Kristján um atkvæðagreiðslur í bæjarstjórn, líklega á hann við söluna á eignum bæjarins til Fasteignar h/f víst er það rétt að Samfylkingarmenn í bæjarstjórn féllust á þennan gjörning sem bæjarstjóri fullyrti að fjármálastjóri og endurskoðandi bæjarins mæltu með, en er alrangt eins og komið hefur fram. Að þessu tilefni létu þeir Samfylkingarmenn bóka í bæjarstjórn að þeirra samþykki væri háð því að "mestum hluta fjármunanna yrði varið í niðurgreiðslu skulda", sem bæjarstjórinn hirti síðan ekkert um.

Þeir Sjálfstæðismenn forðast eins og heitan eld að ræða efnisatriði þegar rætt er um hinn ofboðslega leigugjald, sem Fasteign h/f innheimtir af eignunum.
Gaman væri að fá að sjá leigugjaldið sem bærinn þarf að greiða fyrir félagsheimilið Stapa, sem nýverið var selt á 121 milljón en brunabótamatsverð Stapans er 178 milljónir og lóðin ofan við Stapann sem nú er byrjað að byggja á sennilega um 40 milljóna virði ef miðað er við, söluverð lóða á Nikkelsvæðinu, og fá þó færri en vilja lóðir þar til bygginga.Þessi sölugjörningur allur er slíkur að það "er nú varla til að fara með í aðra hreppa" eins og stundum er sagt.

Títtnefndur Kristján ræðir um heilindi og sannleiksást minnihlutafólksins í bæjarstjórn, ja "sá getur nú trútt um talað" í þeim efnum, hans eigin flokksmenn neyddust til að fjarlægja hann af framboðslista sínum í Suðurkjördæmi "vegna vanheilinda hans"eins og einn samherja hans orðaði það, annar kallaði hann "Ljósálf vegna þess að reyndi óheiðarlega að eigna sér lýsingu Reykjanesbrautarinnar", þetta eru nú aðeins orð samherja Kristjáns en ekki andstæðinga.

Þá talar Kristján um blessað lýðræðið og flótta minnihlutans, og "ekki er nú komið að tómum kofanum þar".Hann sjálfur kaus að fara í sérframboð í síðustu alþingiskosningum vegna þess að hann varð undir í lýðræðislegum kosningum innan Sjálfstæðisflokksins.
Kristján Pálsson sigldi þá fram undir merkjum T-listans hvað sá bókstafur stóð fyrir veit ég ekki fyri víst en varla var það fyrir " trúnað og traust".?

Að lokum má geta þess að hann er nú kominn heim í heiðardalinn á ný og hefur víst gleymt öllum fyrri væringum, væntanlega með þá von í brjósti að fá enn á ný eitthvern mola sem fellur til, kannski lóðir, kannski embætti? Eitt er þó næsta víst að þingsæti hjá Sjálfstæðismönnum fær hann seint eða aldrei.

Hilmar Hafsteinsson
070946-2709