Ragnheiður sækist eftir 2.-3.sæti hjá Samfylkingunni í Suðurkjördæmi

Ég hef ákveðið að sækjast eftir 2.-3. sæti á lista Samfylkingarinnar í Suðurkjördæmi fyrir alþingiskosningarnar í vor.

Ég hef víðtæka reynslu af störfum á sviði velferðarmála, sveitarstjórnamála og af  opinberri stjórnun og rekstri, auk þess að hafa um tíma rekið eigið fyrirtæki í félagi við aðra.  Hef m.a. starfað við kennslu og námsráðgjöf  í Fjölbrautaskóla Suðurlands, við félagsþjónustu sveitarfélaga, við Réttargeðdeildina að Sogni og að málefnum fatlaðra.  Auk þess vann ég ýmis störf á námsárum eins og t.d. við löggæslu í Árnessýslu, í fiskvinnslu og við afgreiðslu- og framreiðslustörf.  Ég hef m.a. átt sæti í stjórn Samtaka sunnlenskra sveitarfélaga, verið formaður stjórnar Tónlistarskóla Árnesinga og á sæti í stjórn Eignarhaldsfélagsins Brunabótafélag Íslands.

Málefni sveitarfélaganna eru mér hugleikin og ég tel brýnt að styrkja stöðu þeirra verulega svo þau geti sem best sinnt lögbundnum hlutverkum sínum og að fólk fái þá þjónustu sem það þarf á að halda.  Þá er síversnandi staða þeirra sem minnst bera úr bítum smánarblettur á íslensku samfélagi og þeirri þróun verður að snúa við.  Jafnframt tel ég nauðsynlegt að huga enn frekar að ýmsum brýnum málefnum Suðurkjördæmis, s.s. á sviði samgöngumála og heilbrigðismála. 

Árið 1987 útskrifaðist ég  með próf í uppeldisfræði og starfsréttindi í félagsráðgjöf frá Háskóla Íslands.  Ég hef starfað sem framkvæmdastjóri Svæðisskrifstofu málefna fatlaðra á Suðurlandi frá árinu 2001 og verið bæjarfulltrúi Samfylkingarinnar í Árborg  frá árinu 2002.

Fjölbreytt reynsla mín og menntun í velferðar- og samfélagsmálum mun því nýtast vel í starfi fyrir kjördæmið og ég er reiðubúin til að vinna af krafti að málefnum þess á öllum sviðum. 

Á næstu dögum mun ég opna nýja heimasíðu þar sem ég kynni mín áherslumál og hvet fólk til að líta þar inn, www.ragnheidur.is

Ragnheiður Hergeirsdóttir
framkvæmdastjóri og bæjarfulltrúi í Árborg