Öskubuska: Takk fyrir frábæra sýningu!

Söngleikurinn Öskubuska hefur nú verið sýndur í nokkurn tíma í Frumleikhúsinu við góðar undirtektir. Uppselt hefur verið á hverja einustu sýningu. Ég skellti mér á Öskubusku og varð yfir mig hrifin af framlagi þeirra Írisar, Gunnheiðar og Guðnýjar og allra þeirra sem að sýningunni komu.

Þegar ég gekk út úr leikhúsinu fylltist ég stolti fyrir hönd krakkanna í sýningunni. Sýningin var vel heppnuð í alla staði, vel framkvæmd og umfram allt skemmtileg. Í Öskubusku kemur saman rosalega stór og breiður hópur ólíkra krakka, og þar af nokkrir krakkar sem manni hefði aldrei grunað að færu út í svona verkefni. Ég að sjálfsögðu rosalega stolt af “stelpunum mínum” í fimleikadeild Keflavíkur. Þær sýndu mér enn og aftur hversu rosalega góðir dansarar þær eru. Það sem stóð hins vegar upp úr að mínu mati voru strákarnir í sýningunni. Mér fannst þeir æðislegir, að sjá þá dansa og syngja saman var alveg meiriháttar. Þessi hópur  á hrós skilið fyrir framtak sitt með þessari sýningu, öll sem eitt. Allir krakkarnir eru í skóla og þurfa því að leggja á sig auka vinnu til að ná endum saman. Þeir geta því borið höfuðið hátt enda tókst þeim gríðarlega vel upp. Frábær sýning!

Það er líka æðislegt að krökkunum sé gefinn kostur á að setja upp og taka þátt í sýningu sem þessari. Þarna eru það krakkarnir sem eru aðalatriðið og fá að láta ljós sitt skýna. Margir hverjir eru jafnvel að finna nýja hæfileika í sjálfum sér með þessu hætti, sem þau geta nýtt sér síðar á lífsleiðinni. Vonandi heldur sú stefna sem hér hefur verið tekin áfram enda hefur sýnig sem þessi ekki bara jákvæð áhrif á þá sem taka þátt í henni heldur smitar hún einnig út frá sér með þeim hætti að stemningin sem myndast verður jafnvel til þess að enn fleiri hafa áhuga á því að taka þátt og vera með.
Takk fyrir frábæra skemmtun og enn og aftur til hamingju með sýninguna!

Hildur María Magnúsdóttir
-yfirþjálfari hjá fimleikadeild Keflavíkur