Óháð framboð ályktar um læknamál á Suðurnesjum

Á fundi sem óháð framboð Kristjáns Pálssonar boðaði til í gærkvöldi var ályktað um læknadeiluna á Suðurnesjum. Á fundinum voru um 50 manns og sagði Kristján Pálsson í samtali við Víkurfréttir að fjörugar umræður hefðu skapast á fundinum: „Við erum að vinna að stefnumálum framboðsins og það eru margir sem koma að þeirri vinnu. Við erum ekki tilbúin til að gefa það upp hverjir eru á listanum, en það gerist fljótlega.“ Ályktun

„Fundur Framboðs óháðra í Suðurkjördæmi haldinn í Reykjanesbæ 7. mars 2003 lýsir yfir miklum áhyggjum vegna þess seinagangs sem verið hefur á lausn deilu heilbrigðisráðuneytisins og heilsugæslulækna á Suðurnesjum. Aðeins einn heimilislæknir er starfandi á Suðurnesjum í dag þar sem búa um 16 þúsund manns. Á fimmta mánuð er síðan 12 heilsugæslulæknar gengu úr störfum sínum vegna deilna um kjör og starfsumhverfi. Lipurð og dugnaður starfsfólks Heilbrigðisstofnunar Suðurnesja hefur komið í veg fyrir neyðarástand í heilsugælumálum svæðisins síðan þetta gerðist. Fundurinn skorar á heilbrigðisráðherra að grípa nú þegar til viðeigandi ráðstafana svo þessi deila leysist.“

VF-ljósmynd: Kristján Pálsson á blaðamannafundi í upphafi vikunnar þar sem hann tilkynnti um sérframboð.