Nýr framhaldsskóli á Suðurnesjum

Stapaskólinn?

Í haust verða liðin 30 ár frá því Fjölbrautaskóli Suðurnesja var stofnaður. Sannarlega langur tími en samt svo ótrúlega skammur. Fjölmargt hefur á daga drifið frá því starfið hófst. Fullyrða má að fátt hafi haft jafn víðtæk áhrif á Suðurnesin sem hin beinu og óbeinu áhrif skólans. Án hans hefði svæðið einfaldlega dregist aftur úr og ástand mála væri allt annað og lakara en raun ber vitni.
Í dag lætur nærri að um 1.000 manns stundi fjölbreytt nám við FS. Skólinn er m.ö.o. einn fjölmennasti vinnustaður á Suðurnesjum. Nemendur munu skila sér út í samfélagið og marka þar djúp spor á ýmsum sviðum mannlífs. Þannig leggur skólinn grunn að áframhaldandi vexti á Suðurnesjum.

FS sprunginn.
Á 30 árum hafa orðið æði miklar breytingar á FS. Gildir það jafn um innra starf skólans sem ytri búnað. FS hefur ávallt haft orð á sér fyrir djörfung og framsækni í skólastarfi. Líklegast eru breytingar á húsakosti þó hvað sýnilegastar. Þegar "verst" lét starfaði FS á átta stöðum í bænum – með öllu því óhagræði er slíku fylgir. Margsinnis hefur verið byggt við skólann en síðasta stækkun skólans hefur skilað glæsilegri aðstöðu og búnaði sem sómi er að og hæfir vel nemendum sem frábæru starfsfólki. En skólinn heldur áfram að dafna og þrátt fyrir miklar byggingar er þegar farið að þrengja að. Þá hljótum við að spyrja: Hvað næst?

Undirbúa nýjan skóla strax.
Svarið er einfalt: Byggja nýjan framhaldsskóla á Suðurnesjum! Flestir geta tekið undir það að ekki sé æskilegt að framhaldsskóli sé mikið stærri en 1.000 nemendur. FS hefur náð þeirri stærð. Fólksfjölgun heldur áfram á Suðurnesjum og er jafnvel spáð aukningu sem nemur um 5.000 íbúum á allra næstu árum. FS getur ekki tekið við þeirri fjölgun fremur en grunnskólarnir. Þess vegna er stækkað við grunnskólanna eða nýir byggðir. Þeir nemendur eldast og verða komnir í framhaldsskóla fyrr en varir. Við verðum að vera í stakk búin til að bjóða þeim aðstöðu til náms. Þess vegna er ekki seinna vænna en að byrja strax að huga að nýjum framhaldsskóla á Suðurnesjum. Að öðrum kosti verður dregst svæðið aftur úr. Suðurnes eru orðin það stór að þau krefjast nýs framhaldsskóla. Á vegum menntamálaráðuneytisins er nú unnið að úttekt á því hvar þörf sé fyrir nýja framhaldsskóla. Sveitarstjórnafólk hér syðra verður að láta vel í sér heyra og koma Suðurnesjum á hið nýja kort framhaldsskólanna. Það skyldi þó aldrei fara svo að framtíðarsýn Valtýs heitins Guðjónssonar, um Stapaskólann, vestan Njarðvíkur, eigi eftir að rætast. Þörfin er a.m.k. orðin aðkallandi og mikilvægt að halda vöku okkar um þetta mikla hagsmunamál Suðurnesja.

Hjálmar Árnason,
alþingismaður.