Námskeið í Íþróttaakademíunni

Hvernig í ósköpunum á ég að fara að þessu?
Á hverju á ég að byrja?
Er þetta ekki hrikalega flókið og mikið vesen?

Þetta eru spurningar sem margir spyrja sig þegar þeir standa frammi fyrir því að vilja breyta lífstíl og mataræði til batnaðar. Mörgum finnst þetta óyfirstíganlegt vandamál og gefast þar af leiðandi upp, jafnvel án þess að reyna.
“Í dag er þetta ekkert mál” segir Inga Kristjánsdóttir næringarþerapisti. Hún segir að fólk þurfi einfaldlega leiðsögn um hvar það eigi að byrja og hverju það geti auðveldlega breytt til batnaðar.
 “Stórmarkaðirnir keppast nú við að auka hillupláss í verslunum sínum fyrir heilsuvörur og lífræna úrvals fæðu er hægt að fá úr flest öllum fæðuflokkum í dag” segir Inga. Hún segir að heilsuvöruverslunum hafi fjölgað mikið á síðustu misserum og úrval matvöru stóraukist. “Það er meira að segja hægt að fá kex, kökur og kartöfluflögur úr lífrænu hráefni, sem eru þá laus við transfitusýrur og hvítan sykur og það kann líkaminn að meta” segir Inga. Hún leggur áherslu á að það sé alls ekkert meinlætalíf að breyta og bæta mataræðið.
“Þetta snýst um að læra að velja betra hráefni og gera mun á illa unni fæðu, fullri af aukaefnum og góðum vel unnum matvörum án aukaefna.”

Á morgun, fimmtudaginn 9. nóvember mun Inga halda fyrirlestur í Íþróttaakademíunni sem hún kallar “Einfalda leiðin”. Þar mun hún leiða fólk í allan sannleikann um það hvað það er í raun einfalt að breyta mataræðinu til batnaðar og hvernig farið er að því að verða líkamanum út um öll þau næringarefni sem hann þarfnast. Einnig mun hún kenna fólki hvernig það getur komið stjórn á blóðsykurinn og hvaða fitu og olíur er best og hollast að nota í matargerð og til inntöku. “Ég verð líka með sýnishorn með mér af ýmsum matvörum, því fólki finnst gott og lærdómsríkt að sjá hvernig þessar vörur líta út” segir Inga.

Þátttökugjaldið á fyrirlesturinn er 2.000krónur og hægt er að skrá sig í síma 420-5500 og á  [email protected]