Miðstjórn Frjálslynda flokksins gagnrýnir Gunnar

Miðstjórn Frjálslynda flokksins samþykkti yfirlýsingu í dag þar sem segir, að úrsögn Gunnars Örlygssonar, alþingismanns, úr flokknum hafi komið miðstjórninni gersamlega í opna skjöldu.
„Það er augljóst mál, að þingmaður sem nú vill styðja ríkisstjórn Sjálfstæðisflokks og Framsóknarflokks undir forystu Halldórs Ásgrímssonar, á ekki heima í Frjálslynda flokknum.
Það er jafnframt fullvíst að flokksmenn og kjósendur Frjálslynda flokksins í Suðvesturkjördæmi og öðrum kjördæmum landsins voru ekki að kjósa þingmann fyrir Sjálfstæðisflokkinn. Miðstjórn Frjálslynda flokksins telur það lýsa litlum drengskap af hálfu Gunnars Örlygssonar að nota fylgi kjósenda Frjálslynda flokksins til þess að styrkja ríkisstjórnina til verka þvert á hans eigin málflutning.
Þá harmar miðstjórnin ávirðingar Gunnars í garð flokkssystkina sinna í Frjálslynda flokknum og telur þær ómaklegar," segir í yfirlýsingunni. Morgunblaðið á Netinu greinir frá þessu í dag.