“Metnaðar-leysi” H-listans!

Ástæða þess að þessi orð eru skrifuð er grein Árna Árnasonar í Víkurfréttum þann 24. apríl síðastliðinn. Ekki var það greinin sjálf sem fékk mig til að skrifa, heldur þau slagorð sem undir greinina voru skrifuð: “Siðferði – árangur – metnaður”.“Metnaður” H-listans á síðasta kjörtímabili var ekki meiri en svo að við afgreiðslu þriggja ára áætlunar Gerðahrepps, sem unnin var af F-listanum, sátu H-listamenn hjá án þess að koma með svo mikið sem eina breytingatillögu.

Við afgreiðslu á möguleikum að framtíðaskipulagi fyrir Garðskagasvæðið setti H-listinn sig á móti, þrátt fyrir að þarna eru miklir möguleikar á uppbyggingu m.t.t. byggðarsafns og ferðatengdar þjónustu. Hvar var “metnaðurinn” þá?

“Metnaður” H-listans á uppbyggingu svæðisins í kringum Dvalarheimilið Garðvang er ekki meiri en svo að þeir voru hrifnir að hugmyndinni í upphafi, en vinna svo hörðum höndum á móti byggingu þar núna, þrátt fyrir að til standi að efla þjónustu við aldraða með þessu móti.

Já og ekki síst var H-listinn ekki fylgjandi hlutafjárvæðingu Hitaveitu Suðurnesja, þó ekki sé annað að sjá á reikningum Gerðahrepps, og annara nágrannabyggðalaga, að þetta skref hafi verið stór ávinningur fyrir sjóði þeirra. Þrátt fyrir ofangreint hafði oddviti H-listans seinna áhuga á að setjast í stjórn H.S hf, en hlaut reyndar ekki til þess nægt fylgi.

“Árangur” H-listans á síðasta kjörtímabili, fyrir utan að vera á móti framkvæmdavilja F-listans, var að taka stóran hluta af þriggja ára áætlun Gerðahrepps (sem er unnin af F-listanum og H-listinn sá sér ekki fært að samþykkja) og gera svo að stefnuskrá sinni!

Ég hvet kjósendur til að velta svo fyrir sér “Siðferði” hlutanum!

Að lokum til áréttingar: Sveitarstjóri Gerðahrepps, hver sem hann er, er ráðinn til að framfylgja þeim samþykktum sem meirihluti hreppsnefndar ákveður að ráðast í hverju sinni.
Sveitarstjóri Gerðahrepps er að sjálfsögðu sveitarstjóri allra Garðmanna, og ég veit ekki betur en að Garðmenn, hvaða flokki sem þeir svo tilheyra, hafi getað leitað til hans og fengið hjálp við úrlausn sinna mála.

X-F

Einar Jón Pálsson
skipar 2. sæti F-listans, lista framfarasinnaðra kjósenda