Loksins ferskt vatn í flugstöðinni

Loksins, loksins má segja núna þegar búið er að taka ákvörðun um að láta hreint og óklórblandað vatn í FLE og nærliggjandi húsnæði. Það hefur verið okkur til skammar að í FLE hefur ekki verið hægt að bjóða upp á annað en klórblandað vatn.Hugsið ykkur ferðamennina sem lesa í bæklingum um hreinasta vatn í heimi - svo þegar þeir lenda hér fá þeir klórvatn uppi í flugstöð. Eða starfsfólkið sem hefur í mörg ár þurft að taka með sér vatn að heiman til að hella upp á almennilegt kaffi. Ég vil þakka Hjálmari Árnasyni, alþingismanni okkar, fyrir að hafa tekið þetta mál upp og komið því í höfn. Hann hreyfði þessu fyrst inni á Alþingi en hefur síðan verið stöðugt að ýta á aðila til að klára verkið. Alls konar óvissa kom upp með hver ætti að borga brúsann en að lokum tók stjórn FLE af skarið og ákvað að láta hrinda þessu í framkvæmd. Ég vil þakka stjrón FLE fyrir þessa góðu ákvörðun. Nú mun málið vera í vinnslu og getum við innan nokkurra vikna farið að drekka hreint og ferskt vatn úr krönum FLE.
Ég segi bara til hamingju með vatnið.

Þorsteinn Árnason,
starfsmaður IGS.