Kvenskörungur í framsóknarframboð

Helga Sigrún Harðardóttir sendi í kvöld frá sér tilkynningu þar sem hún býður sig fram á lista Framsóknarflokksins í Suðurkjördæmi. Helga Sigrún er Suðurnesjamönnum að góðu kunn en sl. 3 ár hefur hún unnið á Markaðs- og atvinnuskrifstofu Reykjanesbæjar.

Tilkynning
"Ég tilkynni hér með um framboð mitt á lista Framsóknarflokksins í Suðurkjördæmi fyrir alþingiskosningar á komandi vori 2003. Sækist ég eftir 3.-4. sæti á listanum.Helstu áherslumál mín verða nýsköpunar- og atvinnumál með það að leiðarljósi að virkja þann mannauð sem í kjördæminu býr en mikilvægt er að duglegir og kraftmiklir einstaklingar fái notið sín og að þeim verði gert kleift að vinna að þeim verkefnum sem styrkja atvinnulíf svæðisins. Þá er og mikilvægt að efla símenntun með aukinni þátttöku fyrirtækja og stofanana til að viðhalda þeim krafti sem býr í fólkinu, því sjálfu og atvinnulífinu öllu til framdráttar.

Ég mun beita mér fyrir því að ungu fjölskyldufólki verði gert kleift að byggja traust fjölskyldubönd frá upphafi þar sem æskan fær þá athygli og umhyggju sem henni ber og fjölskyldan verði sá hornsteinn sem ungt fólk tekur með sér sem veganesti út í lífið.

Menntamál verða mér hugleikin og aukin framlög til þeirra þar sem menntun tryggir efnahagslegan og félagslegan jöfnuð í samfélaginu en fjárfesting í mannauði er einhver sú besta fjárfesting sem lítil þjóð eins og Ísland getur tekið þátt í með það fyrir augum að virkja sköpunarkraft og þor þeirra kjarkmiklu einstaklinga sem landið byggja.

Ég er 33 ára og á eina dóttur, Írisi Ösp, nema í Kvennaskólanum í Reykjavík. Ég er menntaður kennari frá KHÍ, námsráðgjafi frá HÍ og lauk mastersprófi í mannlegum samskiptum frá Oklahoma háskóla í Bandaríkjunum s.l. vor. Ég hef starfað við kennslu og ráðgjöf, dagskrárgerð og dagskrárstjórn í útvarpi og sjónvarpi auk blaðamennsku. Ég starfaði sem atvinnuráðgjafi á Markaðs- og atvinnumálaskrifstofu Reykjanesbæjar s.l. þrjú ár en lét af störfum þar 1. nóvember s.l. vegna skipulagsbreytinga. Ég hef verið formaður FUF í Reykjanesbæ og sit í stjórn Flugstöðvar Leifs Eiríkssonar."