KR sendi kjúklinga til KEF
HVERNIG Í ÓSKÖPUNUM dettur foreldrum barna það í hug að senda börn sín út í umferðina án þess að vera með endurskinsmerki? Hvaða aulaháttur er það? Öll börn eiga að vera með endurskinsmerki og foreldrarnir að sjálfsögðu líka. Kallinn hefur ekið framhjá mörgum börnum sem eru á leið í skólann, eða úr skóla án endurskinsmerkja. Foreldrar – komið þið þessu í lag.KALLINN HEFUR séð nýja bæjarhliðið upplýst við Vogastapa og Kallinn er mjög ánægður. Skiltið er flott að hans mati og á bara eftir að verða jákvætt fyrir sveitarfélagið. Þrjár milljónir eru ekki mikið fyrir skilti sem þetta – prýði fyrir bæinn.
ÞEIR ERU margir sjálfstæðismennirnir sem hafa hlegið dátt að því að Forseti vor hafi ekki verið boðaður á ríkisráðsfund. Og að sama skapi hefur Kallinn heyrt í mörgum Samfylkingarmanninum sem finnst það óverjandi að Forsetinn hafi ekki verið boðaður. Ótrúleg þessi pólitík. En ætli Davíð hyggi á forsetaframboð í vor?
HVERNIG FINNST fólki hið nýja DV? Kallinn óskar eftir viðbrögðum!
MARGIR ÍBÚA VOGA Á Vatnsleysuströnd eru ekki par ánægðir með sorphirðugjöldin þar á bæ. Segja þau mun hærri en í nágrannasveitarfélögum. Kallinn óskar eftir skýringum. Eru gjöldin í Vogum hærri en annarsstaðar?
KALLINN HVETUR alla til að mæta á bikarúrslitaleikina sem fram fara í Laugardalshöll um helgina og minnir á ódýrar rútuferðir á leikina. Kallinn yrði verulega hissa ef fólk myndi láta þessa stórleiki fram hjá sér fara. Allir í höllina!
KALLINN er annars verulega reiður fyrir hönd knattspyrnudeildar Keflavíkur, en deildin stóð fyrir glæsilegu fótboltamóti um síðustu helgi sem gekk vel, fyrir utan eitt. KR-ingarnir sendu kjúklingalið sitt til að spila við Keflvíkinga og sögðu forsvarsmenn KR að ástæðan væri sú að aðalliðið ætti að spila í Reykjavíkurmótinu daginn eftir. Kallinn er vondur yfir þessu virðingarleysi sem KR-ingar sýndu Keflavík. Leikurinn var marklaus fyrir vikið. KR-ingar þurfa að læra mannasiði og forsvarsmenn Keflavíkur ættu að fara fram á afsökunarbeiðni.
FÓTBOLTAKVEÐJA;
[email protected]
