Konur fella ríkisstjórnina

Við höfum sögulegt tækifæri til að fella ríkisstjórnina í vor. Þar skiptir fylgi kvenna miklu máli og má segja að konur séu gerendur í þessum kosningum. Stjórnmálaspekúlantar reyna að kryfja kvennafylgið þessa dagana, en því miður eru stjórnendur pólitískrar umræðu hér á landi yfirleitt karlar sem klóra sér í kollinum yfir því þegar konur taka völdin í sínar hendur. Karlar og konur búa ekki við sama veruleikann og því er þess varla að vænta að kynin hafi sömu forsendur til að taka afstöðu í kosningum. Skoðanakannanir síðustu vikna staðfesta þetta.

Fyrir mig sem konu skiptir það máli að sú stjórn sem sest hér að eftir kosningar komi með raunhæfar tillögur til að bæta líf mitt og kynsystra minna. Kröfur mínar eru einfaldar:

• Að ofbeldi karla gegn konum linni.

• Að konur séu metnar að verðleikum í starfi.

• Að starfrækt sé öflugt velferðarkerfi svo að ólaunuð umönnunarstörf lendi ekki á herðum kvenna.

• Að konur fái völd á við karla.

Þetta eru þær forsendur sem margir kvenfrelsissinnar hafa í huga þegar gengið er til kosninga. Vinstrihreyfingin – grænt framboð er sá flokkur sem lengst hefur gengið í því að koma með róttækar tillögur til úrbóta á þessu sviði.

Til að taka á ofbeldi karla gegn konum hafa Vinstri græn lagt til að karlar verði gerðir ábyrgir fyrir að kaupa konur og að lögreglan fái auknar heimildir til að koma á nálgunarbanni þegar um ofbeldi inni á heimilum er að ræða. Við höfum lagt til að fórnarlömb mansals fái fórnarlamba- og vitnavernd, að kynfræðsla fari fram í skólum til að auka virðingu kynjanna hvert fyrir öðru, og svo mætti áfram telja.

Til að hækka laun kvenna hafa Vinstri græn lagt fram auknar heimildir jafnréttisstofu til að fara inn í fyrirtæki og afla upplýsinga um launamál og beita sektum ef um launamisrétti er að ræða. Sömuleiðis skiptir máli að hið opinbera sé fyrirmyndaratvinnurekandi þegar kemur að jöfnuði og kynjajafnrétti.

Miklu skiptir fyrir konur að rekið sé öflugt velferðarkerfi og lögðu Vinstri græn það til fyrir fjórum árum að leikskólar verði gjaldfrjálsir. Öflug þjónusta við aldraða er sömuleiðis forgangsatriði og að grunnþjónusta í heilsugæslu verði gjaldfrjáls. Öflugt velferðarkerfi verður einungis rekið með samábyrgð sem felst í að nota skattkerfið til jöfnunar.

Konur hafa ekki völd á við karla í samfélaginu og ekkert virðist þokast til betri vegar í þá átt. Fáar raunhæfar tillögur hafa komið fram og ef kvennabarátta síðustu aldar hefur kennt okkur eitthvað, þá er það vitneskjan um að jafnréttið komi ekki af sjálfu sér, það þarf að berjast fyrir því. Vinstri græn hafa borið fram þá hugmynd hvort tími sé kominn á róttækar aðgerðir eins og kynjakvóta. Á meðan aðrar hugmyndir hafa ekki komið fram stendur það óhaggað að grípa verður til róttækra aðgerða til að jafna hlut karla og kvenna innan fyrirtækja, jafnt sem í stjórnmálum.

Ein af grunnstoðum Vinstrihreyfingarinnar – græns framboðs er kvenfrelsið. Öll hugmyndafræði okkar byggir á kvenfrelsi, umhverfisvernd og jöfnuði, enda eru þetta stóru viðfangsefni framtíðarinnar. Atkvæði kvenna skiptir máli, snúum bökum saman og kjósum okkur til áhrifa, sameinumst um þau mál sem skipta konur mestu máli. Kjósum VG í von um frelsi frá karllægri ríkisstjórn.

Alma Lísa Jóhannsdóttir skipar 2. sæti VG í Suðurkjördæmi