Knýjum fram lækkun trygginga

Almenningur sér fram á stöðugt hækkandi verð á bifreiðartryggingum og virðist ekki koma nokkrum vörnum við. Það sama er upp á teningnum hvað varðar aðrar tryggingar. Hvernig má það vera að launaþegahreyfingin á Íslandi hafi ekki skoðað þessi mál eins og kollegar okkar á Norðurlöndum gera. Þar er launþegahreyfingin afar öflug og beitir sér þegar svona mál koma upp á yfirborðið.
Til er dæmi að menn hér á landi hafi brugðist við. Skemmst er að minnast þegar tryggingarfélögin töldu sig þurfa 60 til 70% hækkun á bifreiðatryggingum. Félag íslenskra bifreiðaeigenda lét til sína taka og bauð upp á ódýrari tryggingar. Í kjölfarið lækkuðu tryggingar umtalsvert.
Til að knýja á samkeppni og lækkun trygginga sé ég fyrir mér að launþegahreyfingin óskaði eftir tilboðum í 20-40.000 bíla og eins gætu íbúðaeigendur nokkur þúsund heimila sameinast og óskað eftir tilboðum í heimilistryggingar.
Kjarasamningar eru framundan. Lækkun trygginga yrði góð kjarabót og ákveðin kauphækkun sem ekki færi út í verðlagið eins og venjan er.
Ég vil í lokin hrósa Jóhannesi Gunnarssyni hjá Neytendasamtökunum að standa fyrir könnum um verðlag trygginga sem nýlega voru kynnt almenningi.

Sigurður Þorleifsson,
Hjallagötu 4,
245 Sandgerði.