Kallinn sendir pistil að austan

KALLINN GAT bara ekki setið á sér. Tvennt sem hann vill skrifa um: Varnarliðið og breikkun Reykjanesbrautarinnar.

MIKIÐ AGALEGA er Kallinn feginn að Vinstri Grænir fengu ekki einn einasta þingmann kjörinn hér á Suður-nesjum. Þetta kolvitlausa græna lið hefði ekki verið lengi að hrópa að Varnarliðsmönnum og stilla sér upp við varnarhliðið og hrópa: Ísland úr Nató - herinn burt! Sem betur fer þurfum við Suðurnesjamenn ekki að horfa upp á slíkt.

KALLINUM FINNST það skoplegt að sjá nú Jóhann Geirdal standa upp og hrópa yfir allt að hann vilji bjarga málum. Maðurinn hefur verið á móti Varnarliðinu frá upphafi og nú kemur hann sem prins á hvítum hesti, hrópandi “hér kem ég”! Kallinum finnst að hann eigi bara að halda sig við kennsluna og leyfa öðrum að vinna í þessum málum.KALLINN TREYSTIR ríkisstjórninni fullkomlega til að ná samningum við bandarísk stjórnvöld um áframhaldandi varnarsamstarf. Davíð Oddsson er besti maðurinn í verkið og Kallinn treystir honum fullkomlega í það. Kallinn er þess fullviss að herinn verði áfram hér á Íslandi. Það getur vel verið að einhverjar breytingar verði gerðar, en þær verða ekki stórvægilegar. Bíðum, sjáum og heyrum hvað Davíð hefur að segja. Hann kann á Bush!

OG KALLINN hefur fengið það staðfest að Íslendingum var ekki boðið upp á völl á þjóðhátíðardag Bandaríkjanna eins og venja hefur verið. Karnivalhátíðin á vellinum hefur verið fastur liður hjá mörgum börnum, en engin boð bárust af vellinum þetta árið um að íslenskum börnum væri boðið. Kallinn spyr: Er þetta merki um kalda stríðið sem íslensk stjórnvöld eiga í við bandarísk stjórnvöld? Ja, spyr Kallinn sem ekkert veit!

MIKIÐ VILDI KALLINN að Suðurnesjamenn ættu eins duglega þingmenn og þá sem eru í Norðausturkjördæmi. Þeim tekst að gera allt vitlaust í þjóðfélaginu yfir því að jarðgöngum frá Siglufirði til Ólafsfjarðar er frestað um tvö ár. Hvað er að í þessu þjóðfélagi? Hvað er að gerast? Það hefur tekið mörg ár að fá breikkun Reykjanesbrautarinnar í gegn, þrátt fyrir að fjöldi manns hafi látist þar í umferðarslysum síðustu áratugi.

OG EKKI NÓG með það! Breikkun brautarinnar á að taka mörg ár! Gerum eitthvað - mótmælum!

KALLINN ER AFTUR farinn að Kárahnjúkum! Honum líður vel fyrir austan.