Kallinn í klukkuturninum

SUMARIÐ ER SVO sannarlega komið með öllum sínum fuglasöng og tilheyrandi. Yndislegur tími og ekki skemmir fyrir að Eurovision er á næsta leiti. Söngfuglinn hún Birgitta okkar á svo sannarlega eftir að standa sig vel og verða íslendingum til sóma. Kallinn verður að sjálfsögðu límdur fyrir framan sjónvarpið um helgina, með popp í annarri og kók í hinni.

KALLINN VERÐUR að hrósa bæjarstjórn Sandgerðis fyrir framsýni með fyrirhugaðri byggingu ráðhúss í bænum. Í Morgunblaðinu í síðustu viku mátti lesa fróðlega grein um þetta stórkostlega og mikilvæga verkefni Sandgerðinga.ÞAÐ ER NÁTTÚRULEGA alveg ljóst að bæjarstjórnin þarf ráðhús. Bæjarstjórnin vinnur að mörgum mikilvægum málefnum og þegar ákvarðanir þarf að taka er nauðsynlegt að gera það í ráðhúsi. Gömlu bæjarskrifstofurnar eru að verða of litlar fyrir framtakssemi og nýjungagirni bæjarstjórnarinnar.

RÁÐHÚSIÐ á eftir að gæða atvinnulíf Sandgerðis nýju lífi. Við ráðhúsið verður klukkuturn með klukku sem mun hringja á klukkustundar fresti. Klukkan er alger nauðsyn fyrir starfsmenn þeirra fjölmörgu fyrirtækja sem sest hafa að í Sandgerði síðustu ár. Starfsmenn þessara nýju fyrirtækja vinna það mikið að stór klukka í klukkuturni í miðjum bænum er nauðsynlegur fyrir þá til að vakna.

KALLINUM FINNST bæjarstjórnin einnig sýna mikla framsýni með því að byggja ráðhús áður en sveitarfélög á Suðurnesjum verða sameinuð. Ráðhús Sandgerðis mun þá hýsa þjónustukjarna Sandgerðis þegar sveitarfélögin hafa sameinast. Og það er alveg ljóst að vel verður að búa að starfsmönnum Reykjanesbæjar sem munu starfa í ráðhúsinu.

ENNÞÁ MEIRI snilld verður það að teljast að fá Búmenn til að reisa ráðhúsið og íbúðirnar sem þar verða einnig. Bæjarsjóður getur þá bara leigt ráðhúsið og Kallinn efast um að það sé dýrt og það er til mikilla hagsbóta fyrir bæjarsjóð.

EN AFTUR AÐ klukkuturninum! Kallinn efast ekki um það að turninn á eftir að auka ferðamannastraum til Sandgerðis gríðarlega. Þar mun fulltrúi bæjarstjórnar án efa sitja með bauk fyrir framan sig og telja inn ferðamennina sem vilja fara í turninn og virða fyrir sér útsýnið yfir Sandgerði. Auk alls annars verður þetta að teljast mikil framsýni.

KALLINN LEGGUR reyndar til að bæjarstjórn Sandgerðis fari í fundarferð um landið til að kynna fyrirhugað ráðhús Sandgerðinga og hvetja önnur sveitarfélög til að reisa ráðhús. Í hverju sveitarfélagi þarf að vera ráðhús til að hjól atvinnulífsins nái að snúast með eðlilegum hraða.

OG NÚNA EFTIR að fiskimjölsbræðslan með sínum strompum er farin úr Sandgerði þá er það algjör snilld að reisa turninn til minningar um þá verksmiðju. Það eina sem Kallinn getur gagnrýnt við ráðhúsið er staðsetningin. Af hverju verður ráðhúsið ekki þar sem fiskimjölsverksmiðjan var? Í gegnum ráðhúsið eiga gríðarlegir fjármunir eftir að renna og ef hugað er að útsjónarsemi og framsýni verða starfsmenn bæjarins að hafa gott útsýni út á hafið. Hjól atvinnulífsins eru svo sannarlega farin að snúast í Sandgerði og Kallinn hvetur bæjarstjórnina til að vinna áfram að spennandi verkefnum í sveitarfélaginu.

Í LOKIN VILL Kallinn slá fram hugmynd fyrir bæjarstjórnina um að reist verði tónlistarhús í Sandgerði. Það myndi gera enn meira fyrir atvinnulífið og íbúa bæjarins.

Klukkuturnakveðja,
[email protected]