Kallinn ennþá fokvondur
SVO VIRÐIST sem framboðsfundur allra stjórnmálaflokkanna verði haldinn á Ránni 7. apríl klukkan 20:00. Allir frambjóðendur hafa haft samband við Kallinn og samþykkt að mæta. Björn Vífill á Ránni hefur sent Kallinum bréf og er tilbúinn. Þannig að fundurinn verður haldinn. KALLINN ER ekki ánægður með viðbrögðin við skrifunum í síðustu viku um heilsugæsluna á Suðurnesjum og dæmalaust ástand á þeim bænum. Tveir aðilar hafa tekið til hendinni varðandi málið. Óháð framboð Kristjáns Pálssonar ályktaði um deiluna og sveitarstjórn Gerðahrepps einnig. En ekkert hefur heyrst frá öðrum aðilum. Eru þeir sem þykjast stjórna málum hér á Suðurnesjum algerar liðleskjur? Hvað eru þeir að hugsa um? Þeir eru allavega ekki að hugsa um þarfir íbúanna. Og það er greinilegt að það eru ekki að koma sveitarstjórnarkosningar. Því ef svo væri, þá væru þeir uppi um allt leitandi að lausn á deilunni.REYNDAR ER það skrýtið að þessir blessuðu alþingismenn og tilvonandi alþingismenn, þ.e. frambjóðendur skuli ekki láta heyra í sér. Þora þeir ekki að taka af skarið og vinna að lausn deilunnar? Við hvað eru þeir hræddir? Það er alveg ljóst að heilbrigðisráðherra þarf að leysa þessa deilu og koma læknum á heilsugæsluna. Í stjórnmálum í dag er það alþekkt að ráðherrar séu beittir þrýstingi, bæði frá mönnum og samtökum. En það er greinilegt að þessir blessuðu þingmenn eru ekkert að gera til að þrýsta á ráðherra. Hann fær bara að vaða uppi, brosandi og haldandi því fram að verið sé að leysa deiluna. Bull og vitleysa!
OG HELGA Valdimarsdóttir er búin að gefast upp. Hún hefur barist einarðlega gegn þessu óréttlæti og sýnt hvað í íbúunum býr. En hún getur ekki haldið áfram endalaust, enda mest verið ein í baráttunni. Þið – hinir svokölluðu forsvarsmenn sveitarfélaganna á Suðurnesjum (aðrir en Gerðahreppur og Kristján Pálsson) ættuð að skammast ykkar því dug- og áhugaleysi einkennir aðkomu ykkar að þessu máli. Ef Kallinn mætti ráða myndi hann rjúfa þing og boða til kosninga strax. Og leyfa íbúunum að velja einstaklinga sem hafa þor og kjark til að berjast fyrir sjálfsögðum mannréttindum hér á svæðinu.
JÁ, KALLINN ER ennþá fokvondur út af þessu sinnuleysi! Og hann mun halda áfram – þangað til lausn finnst á þessu mannréttindabroti.
JÓN KRISTJÁNSSON heilbrigðisráðherra á einnig að skammast sín og það er von Kallsins að Hjálmar Árnason, samflokksmaður hans geti komið vitinu fyrir manninn.
KALLINN ER ánægður með bæjarstjórnina að hafa bannað einkadans. Þó ekki sé hægt að sanna að vændi sé stundað á þessum stöðum, þá er rétt að banna dansinn. Því ekki vill Kallinn lifa í samfélagi sem leyfir stöðum að starfa þar sem vændi fer hugsanlega fram. Bara það að grunur leiki á því er næg ástæða til að banna þetta. Sú spurning, hvort vændi fari fram annarsstaðar er allt annars eðlis og fyrir lögregluyfirvöld að taka á. En hafa ber í huga að vændi er elsta atvinnugrein í heimi og vændi er stundað hér á Íslandi og verður áfram.
KALLINN óskar Suðurnesjafréttum alls hins besta með málgagn Sjálfstæðisflokksins á Suðurlandi!
