Kallinn á sameiningarbuxum!
STRÁKARNIR okkar eru frábærir. Með því að hringja í 907-2800 þá styrkið þið strákana um 800 krónur. Kallinn er búinn að hringja, enda hvernig er annað hægt eftir svona frábæran árangur. Kallinn gengur út frá því að Ísland vinni Pólverja en sá leikur var í gær [kallinn skrifar pistilinn á þriðjudagskvöldi]. Stórkostlegur árangur og við eigum að styðja við bakið á þeim - 800 kallinn skiptir þá máli, en ekki okkur. Hringjum og ÁFRAM ÍSLAND!NÚ EIGA Sandgerðingar að sameinast Reykjanesbæ - það er alveg ljóst. Til hvers haldið þið að fyrirtæki sameinist - til að auka hagkvæmni og samlegðaráhrif. Það myndi gerast ef sveitarfélögin yrðu sameinuð. Hvaða rök eru fyrir því að Sandgerði eigi ekki að sameinast Reykjanesbæ? Kannski bæjarstjórinn og allir hinir séu hræddir við að missa launin sín, en það eru ekki rök. Það verður að hugsa um hagsmuni sveitarfélagsins! Það verður að horfa til framtíðar og sjá fyrir sér hvernig hagkvæmast sé að reka sveitarfélagið. Hreppapólitíkin er liðin undir lok. Yngri kynslóðir byggja nú sveitarfélögin og unga fólkið vill sameinast. Það er einfalt reikningsdæmi að sjá það út að það er hagkvæmt að sameina Sandgerði og Reykjanesbæ. Allir þeir sem hafa snert af skynsemi sjá rökin fyrir því. En ef vera skyldi að einhver sé með haldbær rök fyrir þvi að sameining ætti ekki að eiga sér stað - þá óskar Kallinn eftir þeim rökum. KALLINN hefur heyrt það að úrvalsdeildarliðin í körfuboltanum séu ekki sátt við Keflavíkurliðið vegna þess að liðið sagði upp samningi við Kevin Grandberg nokkrum dögum eftir að félagsskiptamarkaði lauk. Kallinn hefur heyrt margar sögur um það hvernig þetta átti sér stað, en ekki veit hann hver er sönn. Forsvarsmenn Keflavíkur hafa ekkert látið í sér heyra um málið - er ekki mál til komið að þeir geri það. Körfuboltaíþróttin á Íslandi á rétt á því.
SÉRSTAKLEGA er gaman að sjá hver viðbrögð við pistli Kallsins í þarsíðasta blaði varðandi fátækt hefur fengið mikil viðbrögð. Jón Gunnarsson og Hjálmar Árnason svöruðu um hæl með ágætis greinum. Ekkert hefur hinsvegar komið frá Árna Ragnari Árnasyni og Þórunni Friðriksdóttur. Þau hafa sjálfsagt ekkert um fátæktarumræðuna að segja fyrst þau svara ekki kallinu. Var ekki Árni Ragnar annars fluttur til Keflavíkur aftur? Eða býr hann ennþá í bænum?
ELLERT B. Schram er nú kominn á lista Samfylkingarinnar í Reykjavík og er flokkurinn heppinn að fá svo öflugan liðsmann í sveitir fylkingarinnar. Nú er það bara spurning hvort Össur leiti ekki til Kristjáns Pálssonar og bjóði honum baráttusæti á lista Samfylkingarinnar í Suðurkjördæmi. Kristján er með það mikið persónulegt fylgi að hann myndi renna inn á þing. Góð hugmynd - ekki satt!
ANNARS er áhugavert að sjá Sjálfstæðismenn tala um fyrirhugaða innrás Bandaríkjamanna í Írak - sérstaklega þegar þeir tala um ógnina sem Hussein skapar umheiminum. Það er líka gaman að sjá og heyra þegar þeir þræta fyrir það að um olíuhagsmuni sé að ræða hjá „Bushurum“. Það er svo augljóst hvað er í gangi. Allir þeir sem hafa kynnt sér framgang og stefnu Bandaríkjanna í alþjóðamálum á síðustu 30 árum skilja hvað er í gangi núna. Það er hrein vitleysa að halda öðru fram en að um viðskiptalega hagsmuni sé að ræða. Hvað er annars málið með N-Kóreu? Engin hætta þar? Hver er ástæðan fyrir því að menntafólk um allan heim hefur verið að vara við stríði? Sjálfstæðismenn ættu að taka upp sögubækurnar, hugsa af skynsemi og reyna að átta sig á málinu í heild sinni. Það yrði þeim til framdráttar.
VONANDI verður Bush ekki endurkjörinn forseti Bandaríkjanna!
Kveðja,
[email protected]
