Kallinn á kassanum

STEFÁN KARL Stefánsson leikari og frumkvöðull að stofnun Regnbogabarna, fjöldasamtökum gegn einelti fær fjórar stjörnur af fjórum mögulegum frá Kallinum. Stefán Karl er búinn að koma af stað umræðu um eineltismál á öllu landinu og honum hefur tekist með frábærum hætti að fá fólk til að hugsa um þessi mál. Það er staðreynd að til eineltis má rekja ýmis vandamál sem eru uppi í þjóðfélaginu í dag, s.s. fíkniefnaneyslu. Með því starfi sem Stefán Karl hefur komið af stað er verið að ráðast á rót vandans - eineltinu. Kallinn hvetur alla sem koma að þessum málum í Reykjanesbæ og á Suðurnesjum að koma á samstarfi við Stefán Karl og Regnbogabörn og vinna markvisst í þessum málum. Það þýðir ekki bara að halda eitt og eitt námskeið - það verður að gera heildstæða áætlun í þessum efnum. Go for it!AÐALSAFNAÐARFUNDIR kirkjanna í Reykjanesbæ eru á næsta leiti og mikilvægt er fyrir íbúa svæðisins að átta sig á því að það getur boðið sig fram til setu í sóknarnefndum. Kallinn hefur fengið upplýsingar um að sumsstaðar hafi sama fólkið setið í sóknarnefndum í 20 ár. Er það ekki of langur tími? Forseti Bandaríkjanna má ekki vera forseti lengur en í 8 ár og það liggur í hlutarins eðli að 20 ára seta í sóknarnefnd er of langur tími. Allt frumkvæði hverfur og kirkjustarfið mótast af 20 ára þrjósku þeirra aðila sem sitja í sóknarnefndunum. Á næstu vikum hljóta kirkjurnar að auglýsa aðalsafnaðarfundi þar sem kosning í sóknarnefndir hlýtur að vera á dagskrá. Fylgist með og bjóðið ykkur fram. Er ekki kominn tími til að skipta?

ÞAÐ ER ÁSTÆÐA til að þakka Víkurfréttum fyrir úttektina á fátækt í Reykjanesbæ í síðasta blaði. Það er ótækt að heiðvirt fjölskyldufólk sem hefur orðið fyrir því láni að eignast börn, en því óláni að geta ekki menntað sig skuli ekki hafa möguleika á því að lifa mannsæmandi lífi. Þetta fólk sem vinnur myrkranna á milli hefur kannski um 200 þúsund krónur í laun fyrir mánuðinn. Börnin eru kannski þrjú. Þau búa í leiguhúsnæði. Haldið þið að þau lifi góðu lífi af þessum launum.? Hvar er þetta öryggisnet sem stjórnmálamennirnir tala um? Ísland er í hópi ríkustu þjóða heims! Er ekki kominn tími til að aðstoða það fólk sem á þarf að halda, sama hvort um sé að ræða láglaunafjölskyldufólk, öryrkja, fólk með félagsleg vandamál, einstæðar mæður og fleiri hópa? Nú eru kosningar á næsta leiti og það þarf að grípa tækifærið og koma þessum málum í lag - hvort sem hækka þarf launin eða bæta félagslega aðstoð. Kallinn krefst þess!

Í FRAMHALDI af þessu vill Kallinn óska eftir svari frá því Suðurnesjafólki sem situr á listum flokkanna í Suðurkjördæmi. Það eru Jón Gunnarsson á lista Samfylkingar, Hjálmar Árnason á lista Framsóknarflokksins, Árni R. Árnason á lista Sjálfstæðisflokksins og Þórunn Friðriksdóttir á lista VG. Kallinn vill fá skýrt svar frá þessum aðilum við spurningunni: Hvernig ætlið þið að beita ykkur fyrir því að sporna við fátækt á Suðurnesjum? Sendið svar á [email protected]. Þess er krafist!

HIN ÁRLEGA SÍMASKRÁ knattspyrnudeildar Keflavíkur kom út fyrir stuttu og er þar margt fróðlegt að sjá. Kallinn fékk ábendingu frá lesanda um það að nafn látins einstaklings væri í bókinni, hjón skráð á sitthvort heimilsfangið og gömul símanúmer gefin upp hjá fólki. Einnig eru íbúar Njarðvíkur staðsettir í Keflavík. Það er ekki nóg að gefa út símaskrá með einhverjum símanúmerum - þau þurfa að vera rétt. Kallinn, sími 4XX XXXX

HÆTTUM öll að reykja!

Kveðja, [email protected]